Kryenegociatori i Republikës së Kosovës me Bashkimin Evropian, z. Jeton Zulfaj, u takua sot në Bruksel me Komisioneren Evropiane për Zgjerim, znj. Marta Kos, për të diskutuar avancimin e procesit të anëtarësimit të Kosovës në BE.
Në takim sipas njoftim të Zyrës së Kryministrit, thuhet se Marta Kos është njoftuar nga Zulfaj, lidhur me kontekstin e miratimit të ligjit për Dhomat e Specializuara të Kosovës në Hagë.
“Kryenegociatori Zulfaj shpjegoi kontekstin e miratimit të ligjit duke theksuar që verdikti i 16 shtatorit ishte i padrejtë dhe që pret të korrigjohet në shkallën e apelit për çka qeveria tashmë ka formuar një grup punues për strategji shtetërore”, thuhet në njoftimin e Zyrës së Kryeministrit.
Më tej në njoftim bëhet e ditur se Zulfaj ka theksuar se Kosova i njeh sfidat e procesit të zgjerimit dhe se ato do të adresohen gjatë rrugës së antarësimit në BE.
“Ai theksoi se Kosova i njeh sfidat e procesit të zgjerimit dhe se ato do të adresohen gjatë rrugës së anëtarësimit në BE. Qytetarët e Kosovës janë mirënjohës për mbështetjen dhe investimet e BE-së, dhe këtë mbështetje e kanë shndërruar në ndërtimin e një shteti me demokraci funksionale, të drejta të barabarta dhe siguri për të gjithë”, thuhet ndër të tjera në njoftim.
Më tej behet e ditur se në takim është paraqitur edhe progresi i Kosovës në forcimin e sundimit të ligjit, konsolidimin e institucioneve demokratike dhe zbatimin e reformave në procesin e anëtarësimit në BE.
