Autoriteteve serbe iu drejtua me një letër.
Kthimin dhe gjykimin në Kosovë të Hasan Dakaj, Sadik Duraku, Nezir Mehmetaj dhe Tefik Mustafa, e kërkoi ministrja e drejtësisë, Albulena Haxhiu nga homologja e saj serbe.
Letra si e tillë, nuk po shihet me ndonjë efekt konkret, madje cilësohet e kotë.
“Në vend që ta ndihmojë familjen e Hasan Dakaj që t’i paguajë avokatët sa më cilësor, sa më profesional në Serbi, ajo e ka bërë një letër e cila edhe në kuptimin diplomatik nuk e ka asnjë kuptim, sepse po e njëjta qeveri e ka një retorikë të tensioneve mes Kosovës dhe Serbisë. Njëri ministër paralajmëron luftë, kryekuvendari paralajmëron trajnim për luftë, ndërkohë ministrja e quan të dashur, të nderuar ministren e drejtësisë së Serbisë”, ka thënë Xhevdet Smakiqi, avokat i Hasan Dakaj.
Avokati i Dakaj, potencon se kjo letër mund të sjellë pasoja negative për të arrestuarit në Serbi.
“Mënyra se si u është drejtuar ministrja, kuptoj që ata do të kenë trajtim edhe më arbitrar se që e kanë sot, sepse orientimi i Kosovës duhet të bëhet me presion ndërkombëtar dhe diplomatik, sepse siç e dijmë edhe ministrja jonë nuk ka asnjë kompetencë që ta lirojë asnjë serbë të cilin e ka arrestuar Prokuroria Speciale dhe që e ka aprovuar Gjykata Themelore në Prishtinë, i njëjti sistem i drejtësisë është edhe atje”, shprehet Smakiqi.
Ndonëse e mirëpresin letrën e Ministres, familja e Tefik Mustafa kanë shpresa të pakta për ndonjë efekt.
“Sa ka efekt kjo shkresë e ministres së drejtësisë, nuk e di as vet. Shumë pak presim prej saj, e kam fjalën prej shkresës. Sepse kemi të bëjmë me një popull që nuk i merr gjërat seriozisht”, ka thënë Qamil Mustafa, djali i Tefik Mustafës.
Letra e dërguar nga Ministria e Drejtësisë, është bazuar në Marrëveshjen për Normalizim të Marrëdhënieve mes të dyja palëve.
