Një vit pas protestave të dhunshme të grupeve ekstremiste serbe në Zveçan, ku u lënduan rreth 100 ushtarë të KFOR-it, nga misioni paqeruajtës është bërë thirrje që autorët e këtij sulmi të mbahen përgjegjës.
“Sot ne nderojmë shërbimet dhe sakrificat e bashkëluftëtarëve tanë, të cilët e vunë jetën në rrezik, për t’i kryer detyrat e tyre për të gjitha komunitetet që jetojnë në Kosovë, në përputhje me mandatin e misionit tonë në OKB. Guximi i tyre ndihmoi të stabiliziohej situata në zonë dhe të parandalojë përshkallëzimin e mëtejmë. NATO-ja thekson se faktet duhet të vërtetohen dhe që autorët duhet të mbahen përgjegjës”, ka thënë komandanti i KFOR-it, Ozkan Ulutash.
Nga Prokuroria Speciale kanë heshtur në lidhje me ecurinë e hetimeve dhe numrit të të kërkuarve.
Kjo shihet si e drejtë e organeve hetuese, derisa rezultatet nga këto hetime vlerësohen se janë në interes të politikës.
“Pushtetit i intereson që prokuroria t’i përfundojë sa më shpejt hetimet, në mënyrë që e njëjta ta përdorë edhe si argument politik karshi faktorëve ndërkombëtar, në lidhje me vendosjen e drejtësisë për personat të cilët kanë kryer këto vepra, që natyrisht kanë qenë të mbështetura nga shteti i Serbisë. Mirëpo, mendoj që prokuroria është në të drejtën e saj, në diskrecionin e saj për t’i zhvilluar hetimet”, ka thënë avokati, Asdren Bytyqi.
Pas dhunës së majit, pati shtim të forcave paqeruajtëse dhe patrullim të KFOR-it në veri të vendit, gjë e cila shënon përforcimin më të madh të kontingjentit të KFOR-it në një dekadë.
Për protestat e dhunshme një vit më parë, një preson është në paraburgim e dy të tjerë, Radosh Petroviq dhe Dushan Obrenoviq, u dënuan me nga 6 muaj burgim pasi e pranuan fajësinë për protestat e dhunshme.
