Eksperti i Politikave të Sigurisë dhe Gjeopolitikës, Ilir Kulla ka folur lidhur me miratimin e rezolutës nga Asambleja e Përgjithshme e Kombeve të Bashkuara që e shpalli 11 korrikun si Ditë Ndërkombëtare të Përkujtimit të Gjenocidit në Srebrenicë.
Kulla ka thënë se Srebrenica është një gjenocid i rrallë që ka ndodhur para syve të botës, ndërsa ka përmendur një shprehje shqiptare se “gjak pa marrë dhe hak pa larë nuk ka”.
“Historia nuk është me sikur, historia ndodhë, Srebrenica fatkeqësisht ka ndodhur dhe ajo masakër fatkeqësisht ka ndodhur edhe para syve të botës. Është një gjenocid nga të rrallët që ka parë bota, që është kështu para kamerave. Por ne shqiptarët kemi një shprehje shumë të bukur “gjak pa marrë dhe hak pa larë nuk ka”. Aty është gjaku i 7 mijë vetave dhe është haku i një populli të tërë i cili është masakruar në sytë e gjithë botës”, është shprehur ai në emisionin “MATRIX” në TËVË 1.
Më tej, njohësi i gjeopolitikës ka vlerësuar se kjo rezolutë tregon qe jemi kthyer nga e drejta e pamohueshme e të gjithë atyre që e vuajtën gjenocidin në Srebrenicë.
“Kanë kaluar 30 vjet dhe më në fund u shkrua e zezë mbi të bardhë, një e vërtetë historike në Organizatën e Kombeve të Bashkuara. Sigurisht në kontekstin e sotëm ajo nuk ka shumë rëndësi, ka rëndësi politike. Në OKB ku ndodhen aleatë shumë të fuqishëm të Serbisë një hap i tillë dhe njohja e këtij gjenocidi edhe nga disa partnerët të rëndësishëm të Serbisë ndërmjet votës dhe abstenimit tregon që jemi kthyer tek të paktën e drejta e pamohueshme e atyre të shkretëve dhe familjeve të tyre të cilët vuajtën atë mizori të jashtëzakonshme”, ka shtuar ai. /teve1.info/
