Ministri i Mjedisit, Planifikimit Hapësinor dhe Infrastrukturës, Liburn Aliu, ka deklaruar se Kosova ka kapacitete të limituara të ujit, për çka ai ka thënë se është domosdoshmëri që ato të rriten.
Aliu ka njoftuar se në qershor të këtij viti pritet të përfundohet edhe harta e menaxhimit të rrezikut nga vërshimet, bashkë me planin për reagim.
“Kosova është një vend i cili ka kapacitete të limituara të ujit dhe jemi në një krizë me të cilën do të ballafaqohemi edhe më keq, për shkak të ndryshimeve klimatike. Kosova është pjesë e Mesdheut, Mesdheu është zona më e ndikuar e ndryshimeve klimatike në glob. 75 përqind të ujit e përbën vetëm Liqeni i Ujmanit, e kemi të domosdoshme që gjatë dekadave në vijim këto kapacitete ujore t’i rrisim sepse në kushte të caktuara kemi ujë tepër si tash në muajin maj kur pritet edhe të kemi vërshime, e të cilat shpesh herë nuk arrijmë t’i menaxhojmë mirë sepse nuk kemi plane të rrezikshmërisë që edhe për atë në qershor e përfundojmë hartën e menaxhimit të rrezikut nga vërshimet, bashkë me planin për reagim”, u shpreh ai në konferencën pas mbledhjes së qeverisë.
Ministri i MMPHI, më tej ka njoftuar lidhur me planet e qeverisë drejt një vizioni të qartë për ujin, që Aliu e ka quajtur jetik.
“E që këtë ujë të tepërt në momente të caktuara e që na duhet në kushte të thatësisë ne nuk kemi mundësi ta menaxhojmë. Prandaj edhe krahas master planit për diga i cili është miratuar nga Ministria e Bujqësisë, studimit të fizibilitetit që jemi në përfundim e sipër për 4 diga të reja dhe një master planit që fillon brenda muajit maj, mendoj që brenda një koha të shkurt Kosova do të ketë një vizion të qartë për ujin që është jetike” shtoi ai. /teve1.info/
