Të hënën, Kryesia e Kuvendit të Kosovës ka mbajtur mbledhjen e ardhshme. Nga kjo mbledhje është bërë e ditur se në këtë javë ka dy seanca plenare mirëpo nuk ka kërkesë zyrtare nga partitë opozitare rreth shpërndarjes së Kuvendit. Edhe pse pa ftesë zyrtare, nga PDK-ja kanë propozuar dy data për zgjedhje të parakohshme.
Kauzën e kanë të përbashkët, por pajtim mes vetë opozitarët për zgjedhje nuk po arrijnë.
Kësisoj, nuk u morën vesh të hënën për thirrjen e një seance parlamentare për shpërndarjen e Kuvendit të Kosovës.
Madje, ende nuk ka kërkesë zyrtare nga partitë opozitare për shpërbërjen e institucionit legjislativ.
Kështu tha pas mbledhjes së Kryesisë së Kuvendit, shefja e grupit parlamentar të Lëvizjes Vetëvendosje, Mimoza Kusari Lila.
Por edhe të hënën, PDK-ja vazhdoi të bëjë thirrje në drejtim të dy partive opozitare për përkrahje.
Madje për shefin e grupit parlamentar të kësaj partie, Abelard Tahiri, 30 qershori dhe 7 korriku janë datat që vendi duhet të shkoj në zgjedhje.
E shefi i grupit parlamentar të AAK-së, Besnik Tahiri prapë tha se nuk do të votojnë mocionin.
Për Tahirin, kërkesa që opozita të kërkojë zgjedhje bashkë është strategji e Kurtit dhe Vetëvendosjes.
Gjatë kësaj javë, Kuvendi i Kosovës do të mbajë dy seanca plenare.
E para është ditën e enjte, ku do të këtë vazhdim të seancës dhe në rend dite ka votimin e tri marrëveshjeve ndërkombëtare dhe ditën e premte do të ketë seancë të re, ku në rend dite do të ketë debat parlamentar të thirrur nga AAK-ja rreth tre vjetorit të qeverisjes.
