Drejtori i Emergjencave në Komunën e Prishtinës, Lulzim Fushtica ka folur lidhur me gjendjen në kryeqytet pas reshjeve të shumta të shiut.
Fushtica duke njoftuar se të gjitha rastet e problemeve nga reshjet kanë qenë në kryeqytet dhe jo në fshatra, ka thënë se tashmë gjendja është e qetë.
Ai ka theksuar se pas reshjeve të mëdha të cilat nisën nga mesnata, kanë trajtuar gjithsej 30 raste.
“Gjendja paraqitet e qetë, nuk kemi asnjë problem, asnjë rast. Si pasojë e reshjeve të mëdha që kanë ndodhur nga mesnata në orët e hershme të mëngjesit ne kemi filluar të pranojmë thirrje të qytetarëve për reagim dhe deri në ora 12 i kemi trajtuar mbi 30 raste në të gjitha pjesët e kryeqytetit. S’kemi pasur raste të raportuara në fshatra, vetëm në lagje të kryeqytetit” u shpreh ai në emisionin “Ditari” në Tëvë 1.
Ndryshe, në orët e hershme të mëngjesit, kryeqytetasit janë zgjuar duke u përballur me vërshime të rrugëve nga të reshurat e shiut, ku më të shprehura kanë qenë në Rrugën “B” e Rrugën “Muharrem Fejza”.
