Kryetari i Kuvendit të Kosovës, Glauk Konjufca sot ka pritur në takim zëvendëskryeministrin e Malit të Zi, Nik Gjeloshaj.
Sipas njoftimit të Kuvendit, Konjufca e ka falënderuar Gjeloshaj për vizitën në Kosovë, kryeparlamentari vlerësoi lart marrëdhëniet midis Kosovës dhe Malit të Zi, si dy shtete me raporte të mira bashkëpunimi.
“Kreu i Kuvendit vuri në pah se Republika e Kosovës i bashkëndan dhe i qëndron përkrah synimeve zhvillimore dhe atyre të integrimit evropian të Malit të Zi. Sipas tij, ky qëndrim forcohet edhe më shumë prej faktit të nevojës së përparimit të rajonit tonë dhe dëshirës për t’i parë gjithnjë e më mirë bashkëkombasit tanë shqiptarë të Malit të Zi”, thuhet në njoftim.
Derisa, të dy palët kanë biseduar për zhvillimet politike në Kosovë dhe Mal të Zi.
Konjufca tha që me Gjeloshaj u pajtuan se zhvillimi dhe siguria e dy shteteve, si dhe e rajonit kërkon angazhim të pandërprerë në mbrojtje të sovranitetit, shtetit të së drejtës dhe demokracisë, kërkon qëndrim të palëkundur kundër agjendës dhe influencës ruse në rajon.
Ndryshe, zëvendëskryeministri Gjeloshaj e ka falënderuar Konjufcën për pritjen, duke shprehur gatishmërinë e bashkëpunimit të mëtejmë për të avancuar interesat e përbashkëta./teve1.info/