Sot janë bërë 43 vjet që kur forcat serbe sulmuan kullën e Nebih e Tahir Mehajt. Dy burrat e Prekazit të Skenderajt, kishin refuzuar të dorëzoheshin para njësiteve speciale serbe duke ua kthyer pushkën për gati 12 orë. Në këtë betejë heroikisht ranë Nebih e Tahir Meha, ndërsa atë se cfarë ndodhi 4 dekada më parë, për Tëvë1 e ka rrëfyer nipi i Tahir Mehës, Iliri.
Nga kulla e vjetër, kanë mbetur vetëm themelet.
Por, historia e saj, nuk është harruar as pas 43 vjetëve.
Është kjo kulla e Mehajve në Prekaz të Skenderajt, e njohur edhe si kulla e rezistencës.
Brenda saj, me 13 maj të vitit 1981, Nebih e Tahir Mehaj, luftuan me orë të tera kundër pushtuesve jugosllav.
Gjithë atë që ndodhi para 4 dekadave, e kujton mirë, nipi i Tahir Mehajt, Iliri.
“Rrethimi kishte ndodhur në ora 01:00 të natës. Në mëngjes e thirrin me megafon, Tahir Meha duhet me u dorëzua, ja i gjallë ja i vdekur. Tahiri doli në dritare dhe u thotë që unë i gjallë nuk dorëzohem”, tha nipi i Tahir Mehes, Iliri.
E gjatë kohës sa po tentohej të negociohej me Tahir Mehajn, disa policë të tjerë kishin filluar realizimin e planin.
“Forcat serbe fillojnë me tradhtuar Tahir Mehën, e marrin shkallën dhe e vendosin në katin e dytë në dritare. Ndërsa poshtë i gjuajnë gazlotsjellës. Tahiri ua kthen pushkën dhe ka qenë një luftë e rreptë”, tha Ilir Meha për Tëvë1.
Nga ky moment filloi edhe beteja njëditore e dy burrave të familjes Mehaj kundër njësiteve speciale të policisë serbe.
“Beteja ka zgjatur nga ora 10:00 e ditës deri në ora 11:00 të natës. Në ora 11:00 tanksi i bie murit përpara dhe e rrëzon ballinën e kullës. Tahiri e sheh që nuk ka ku me qëndruar ma. Kërcen mbi tanke dhe i mbyt serbët, pastaj kërcen në tokë, dhe 40 metra larg kullës bie dëshmor për lirinë e atdheut”, u shpreh Meha.
Gjatë gjithë kohës sa ndodhi beteja, në këtë djep qëndroi vajza 9 muajshe e Tahir Mehës.
Kjo e fundit, i mbijetoi sulmit mizor serb.
“Gjatë një armëpushimi, Tahiri e Nebihu i thonë grave të largohen nga kulla e të shpëtojnë. Por, ato i mbledhin fëmijët por e harrojnë vajzën e vogël në djep. 1:18 pas përfundimit të luftimeve, e kanë marrë policia serbe dhe e kanë dërguar në spital”, tregoi Ilir Meha, nipi i Tahir Mehes.
Ndryshe, autoritetet serbe raportuan se gjatë kësaj beteje u vranë 4 policë serbë dhe u plagosën 3 të tjerë.
Por dëshmitarët thonë se numri i policëve të vrarë, është më i madh.
