Tri skuadrat e para në tabelë, Ballkani, Llapi dhe Drita kanë shënuar fitore në kuadër të xhiros së 32-t të Superligës së Kosovës në futboll.
Distanca ndërmjet këtyre skuadrave ka mbetur e njëjtë edhe pas kësaj xhiroje, me Ballkanin që prinë me 66 pikë, i ndjekur nga Llapi me 64 pikë dhe Drita me 62 pikë të tubuara.
Të gjitha ndeshjet e kësaj xhiroje, janë zhvilluar të dielën. Ballkani fitoi 3:0 në shtëpi ndaj Dukagjinit, me golat e Lindon Emërllahut (7’), kapitenit Edvin Kuc (24’) dhe Nazmi Gripshit nga penalltia në minutën e gjashtë të kohës shtesë.
Fitore në shtëpi shënoi edhe Llapi që triumfoi me rezultatin e ngushtë 3:2 ndaj Feronikelit ’74. Sulmuesi Muhamet Hyseni (22’, 50’) shënoi dy gola dhe asistoi në golin e realizuar nga Ahmed Januzi (32’). Golat për Feronikelin ’74 i realizuan Ruben Tarasco (14’) e Jakup Berisha (44’).
Drita fitoi 3:1 në shtëpi ndaj Fushë Kosovës, ndërsa golat për ekipin vendas i shënuan Blend Baftiu (6’, 53’) e Besnik Krasniqi (77’). Për Fushë Kosovën që tashmë konfirmoi rënien në Ligën e Parë, golin e nderit e shënoi Dorent Hajdari (74’).
Prishtina me golin e Albin Krasniqit në fund të takimit në Prizren e mposhti 1:0 Lirinë, ndërsa Malisheva luajti pa gola në shtëpi ndaj Gjilanit.
