Pretendimet për mangësi në ekspertizën e ekspertëve, u numëruan në shqyrtimin gjyqësor në lëndën e përmbarimit në mes debitorit “Telekom” dhe kreditorit “Dardafon”.
Nga ana e përfaqësuesve të Telekomit, u pretendua se shkak i moszgjidhjes së procesit, shumë punëtorë nuk kanë marrë as paga për tre muaj me radhë.
“Tek e fundit “Telekomi” s’është kompani e jeme, as e atij, as e atij. Është e shtetit edhe do të falimenton, dhe ne nuk guxojmë si menaxhment me marrë përgjegjësi e mu e bo pjesë e manipulimeve të proceseve gjyqësore”, tha Feim Kelmendi përfaqësues i Telekomit.
Të zëshëm në gjykatore ishin edhe përfaqësuesit e tjerë të “Telekomit”, që në seancë ishin në cilësinë e publikut. Kjo solli përjashtimin e tyre nga seanca.
Përfaqësuesit e këtij institucioni kërkuan përjashtimin e njërit prej ekspertëve, nën argumentin se ka konflikt interesi, por që Gjykatësi e refuzoi.
E nga ana e kreditorit “Dardafon”, u tha shkresat e lëndës janë baza e cilësdo ekspertizë dhe hartuesi të saj.
“Cilido ekspert, cilado ekspertizë që punohet lidhur me një çështje, ajo mbështetet ekskluzivisht në të gjitha shkresat e lëndës”, tha Alban Makolli përfaqësues ligjor i Dardafon
Si përfundim, Gjykata vendosi që disa pika të ekspertizës të plotësohen.
“T’i japin sqarime për kamatën në shumë prej 210 mijë euro, si dhe kamataën e vendosur në shpenzimet e procedurës, tha gjykatësi Dren Rugova.
Në vitin 2015, Dardafon iu drejtua Arbitrazhit me pretendimin se Telekomi i Kosovës po bënte shkelje të marrëveshjes pasi refuzonte t’i ndajë numra shtesë dhe të ofronte shërbime 3G dhe 4G.
Lënda shkoi në Tribunalin e Arbitrazhit, i cili vendosi në favor të Dardafonit.
