Zëdhënësi i Qeverisë, Përparim Kryeziu, ka reaguar pas pretendimeve të Listës Serbe për kamerat vëzhguese në hapësirat publike në veri.
Përmes një postimi në Facebook, Kryeziu ka shkruar se kamerat janë në çdo qytet dhe se të njëjtat janë në shërbim të sigurisë publike.
Madje, Kryeziu ka theksuar se këto kamera menaxhohen nga Policia e Kosovës.
“Në komuna të ndryshme me shumicë serbe në Kosovë, përfshirë edhe ato në veri të vendit, strukturat ilegale serbe dhe organizatat terroriste “Mbrojtja Civile” dhe “Brigada Veriore” vazhdimisht kanë përdorur kamerat e vëzhgimit, të cilat kanë qenë të qasshme edhe për institucionet e sigurisë së Serbisë. Një numër i konsiderueshëm i tyre janë sekuestruar nga Policia e Kosovës nën dyshimin se janë përdorur për të monitoruar lëvizjet e qytetarëve dhe të institucioneve të Republikës së Kosovës”, thuhet në postimin e Kryeziut.
Më tej, Kryeziu deklaratën e Listës Serbe, e ka quajtur si reagim ndaj humbjes së mjeteve për presion e frikësim të qytetarëve.
“Në të kaluarën, bashkëpunëtorë të Listës Serbe i kontrollonin këto kamera. E kur kishin një kontroll të tillë, asnjëra prej tyre nuk kishte punuar më 16 janar 2018, kur u vra politikani serb Oliver Ivanoviq në veri të Mitrovicës. Koha e banditëve të kthyer në terroristë të “Brigadës së Veriut” dhe “Mbrojtjes Civile” ka marrë fund. Të gjithë duhet të mësohen me shtetin ligjor në një republikë demokratike”, thuhet tutje në postimin e tij.
Kujtojmë se Lista Serbe ka pretenduar se kamerat e sigurisë në hapësira publike shkelin të drejtat e privatësisë së qytetarëve serb./teve1.info/.
