Ish-gjyqtar i Gjykatës Kushtetuese, Kadri Kryeziu po vlerëson se Asociacioni duhet të nënshkruhet nga Kosova dhe të dërgohet në Gjykatën Kushtetuese para 16 majit, atëherë kur edhe mblidhet Këshilli i Ministrave në Këshill të Evropës.
Kryeziu ka thënë se Asociacioni është një kusht i veçantë për Kosovën, të cilën Qeveria e ka obligim ligjor ta nënshkruajë.
“Asociacioni duhet të bëhet para 16 majit, kur bëhet edhe mbledhja e Këshillit të Ministrave në KiE, duhet të dërgohet në Gjykatën Kushtetuese. Manastiri i Deçanit dhe Asociacioni janë elemente ta quaj të veçanta, të cilat nuk janë kushte universale, por janë të veçanta, janë një far lloj presioni që ne të bëhemi anëtar i rregullt i Këshillit të Evropës. Qeveria e Kosovës e ka për detyrë ta dërgojë në Gjykatën Kushtetuese projekt statutin i cili është i hartuar nga bashkësia evropiane dhe pastaj gjykata ta marr verdiktin e fundit. Besoj që Qeveria e Kosovës do ta nënshkruajë dhe do ta procedojë në Gjykatën Kushtetuese. Asociacioni ka kaluar në Kuvendin e Kosovës me 84 vota për, një kundër dhe një abstenim, kështu që është ligj, dhe qeveria e ka detyrë kushtetuese ta zbatojë”, është shprehur ai në emisionin “Ditari” në TËVË 1.
Ndryshe, Asambleja e Këshillit të Evropës më 15 prill e ka miratuar me 131 vota për, raportin për anëtarësimin e Kosovës në këtë organizatë. Në asamblenë e KiE-së, kundër votuan 29 anëtarë të Asamblesë dhe 11 abstenuan. Raporti i votuar u përpilua nga deputetja greke, Dora Bakoyannis, dhe drafti i këtij raporti ishte miratuar në mars nga Komiteti për Politikë dhe Demokraci i kësaj organizate. /teve1.info/
