Lautaro Martinez duket se po luan sezonin e fundit me fanellën e Interit, pasi zikaltrit kanë vendosur ta sakrifikojnë për të mbushur arkat e klubit, duke qenë se për argjentinasin kanë shfaqur interes disa skuadra.
Klauzola e largimit të tij është 110 milionë euro, megjithatë klubi milanez do të ishte i kënaqur edhe me një shifër prej rreth 80 milionë eurosh, teksa Atletico e Madridit, Arsenali dhe Barcelona kanë bërë hapa konkretë për argjentinasin.
Mediat pranë klubit zikaltër konfirmojnë se Barcelona ka ofruar kartonët e Memphis Depay e Miralem Pjaniç, si dhe 40 milionë euro për të marrë Lautaron, por drejtuesit e Interit kanë refuzuar pa u menduar dy herë.
Shkak është paga e lartë që përfitojnë aktualisht mesfushori boshnjak dhe sulmuesi holandez, pasi synimi i zikaltërve është që të ulin sa më shumë zërin e pagave në bilanc dhe për këtë pritet të ndërpresin kontratat edhe me kilenët Sanchez e Vidal.
Lëvizjen e radhës pritet ta bëjë Atletico e Madridit, pasi trajneri Simeone ka kërkuar pikërisht Lautaron si zëvendësues të Luis Suarez, i cili do të largohet në fund të sezonit nga kryeqyteti spanjoll.
