Presidentja e Kosovës, Vjosa Osmani, thotë se përgjegjës për ndalimin e autobusëve me udhëtarë nga Kosova në Serbi është presidenti serb, Aleksandër Vuçiq.
Presidentja tha se Serbia po hakmerret ndaj qytetarëve të Kosovës për votimin e së martës në Asamblenë Parlamentare të Këshillit të Evropës.
“Serbia po hakmerret ndaj qytetarëve të Kosovës, një ditë pas votimit të KiE-së në APKiE, duke mbajtur pengje në pikat kufitare, duke i frikësuar, konfiskuar dokumente dhe duke i privuar nga ushqimi. Përgjegjës për këtë është një njeri: Vuçiqi”, ka shkruar ajo në platformën X.
Osmani më tej u ka bërë thirrje partnerëve ndërkombëtarë për veprim të shpejtë.
Serbia is retaliating against 🇽🇰 citizens, one day after PACE’s CoE vote, by holding many hostage at border crossings, intimidating, confiscating docs & depriving them of food.
One man is responsible for this: Vucic. As I did all day, I urge our partners for swift action.
— Vjosa Osmani (@VjosaOsmaniPRKS) April 17, 2024
Qindra kosovarë janë mbajtur të bllokuar për mbi 17 orë nga autoritetet serbe në pikat kufitare me Serbinë.
Serbia ka ndaluar autobusë me udhëtarë nga Kosova edhe në kufijtë me Kroacinë dhe Hungarinë, si shenjë hakmarrjeje ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë.
Gjatë ditës, MPJD u ka bërë thirrje qytetarëve të vet që të shmangin “me çdo kusht” kalimin nëpër Serbi./teve1.info/
