Vrasja e Gjyljetës nga burri i saj, ka çuar në 57 numrin e grave të vrara në vetëm 14 vjetet e fundit në Kosovë. Njohësit e çështjeve juridike, thonë se kjo duhet të jetë alarm për autoritetet e vendit, pasi që dënimet nuk po e arrijnë qëllimin. Dështim institucional mbrojtjen e jetës së grave të rrezikuara nga dhuna, po e quajnë edhe në Qendrën për Informim, Kritike dhe Aksion.
Edhe një herë, Kosova u trondit të martën.
Gjyljeta Ukella, përfundoi e vrarë në banesën e saj.
Nëna e tre fëmijëve, dyshohet se u vra nga burri i saj.
Por, për organet e rendit, Edmond Lajqi, nuk ishte person i panjohur.
“Sipas informacioneve të policisë, dalin se të dy rastet kanë të kaluar të dhunës në familje, ku të dy bashkëhsortët janë raportuar për dhunë në familje dhe të dy janë recidivistë të dhunës në familje. Është shumë situatë e dhimbshme vec e tregon, krejt kohën”, tha Medinë Dauti nga Organizata QIKA.
Medinë Dauti nga Qendra për Informim, Kritikë dhe Aksion, thotë se autoritetet në vend, po dështojnë në mbrojtjen e jetëve të grave.
“Përderisa ti je tu bo kampanja kundër dhunës në familje, ndërsa nuk janë duke funksionuar programet rehabilituese të dhunuesve, atëherë dështimi është sistematik. Nëse gjykata është duke e dënuar një person me burg edhe ai person shkon në burg, e pastaj del prej burgu dhe e perserit vepren penale, kjo i bie që ka dështuar ministria e Drejtësisë”, u shpreh Dauti.
Se dënimet nuk po e arrijnë qëllimin, e thotë edhe njohësi i çështjeve të drejtësisë, Yll Zekaj.
Sipas tij, këto raste duhet të jenë alarm për institucionet e vendit.
“Fatkeqesisht deri me tani, qëllimi i dënimit nuk po arrihet, ku njëri prej qëllimeve të dënimit është edhe parandalimi i kryesve, përkatësisht i shoqërisë për të kryer vepra të ngjashme apo të njëjta. Për çdo rast, po shihet që kryesit nuk e kanë pasur këtë si veprën e parë penale këtë që po ndodh, por një seri të veprave të mëhershme, pra janë recidivist të veprave penale”, tha avokati, Yll Zekaj.
Ndryshe, në 14 vjetet e fundit, në Kosovë janë vrarë 57 gra.
