Rezultati i ndeshjes ndërmjet Ulpianës së Lipjanit dhe Vllaznisë së Pozheranit në kuadër të Grupit B të Ligës së Parë është anuluar pasi Komisioni i Garave pranë FFK-së, ka konstatuar se ajo ka qenë e kurdisur.
Në fakt, Komisioni ka vendosur që ndeshja të regjistrohet si e luajtur, por pikët dhe golat nuk do të shkruhen në tabelë. Kjo përballje u zhvillua javën e shkuar në Lipjan dhe i takoi xhiros së 21-të, ndërsa Ulpiana e humbi me rezultatin 4:3 edhe pse pas pjesës së parë ishte në epërsi me shifrat 3:1.
Në vendimin e Komisionit të Garave thuhet se “kjo ndeshje ka qenë e kurdisur” dhe shtohet se bazuar në deklaratat e personit zyrtar të FFK-së, xhirimeve televizive është vërtetuar “mosangazhimi në “lojë i ekipit vendas. Kështu që, krahas anulimit të rezultatit të ndeshjes, janë inicuar edhe procedura disiplinore ndaj të gjithë personave të përfshirë.
Procedura është inicuar ndaj dy klubeve – Ulpianës e Vllaznisë, pastaj personit zyrtar të Ulpianës, Meriton Isufi dhe futbollistëve Ridon Llugiqi, Gentian Emini e Samet Rexhepi. Ndërsa, nuk ka munguar inicimi i procedurës disiplinore as ndaj personit zyrtar të Vllaznisë, Agron Pira.
