“Lufta na e mori strategun më të mirë të kohës”, ka shkruar kryetari i LDK-së, Lumir Abdixhiku, kështu duke përkujtuar heroin, Agim Ramadani.
Përmes një postimi në Facebook, Abdixhiku ka shkruar se në këtë përvjetor, duhet të nderohet kontributi dhe gjurmët e pashlyeshme të Agim Ramadanit, në rrugëtimin për liri e shtet-ndërtim.
“Në historinë tonë të lavdishme; të papërsëritshme, janë disa ditë që aq sa na pikëllojnë, na bëjnë edhe më shumë krenar. Ditë të tilla janë këto të prillit, kur në majet e larta nën udhëheqjen e strategëve të luftës për liri, Agim Ramadani “Katana” dhe Sali Çekaj, u thye kufiri shqiptaro-shqiptar me Betejën e Koshares, atë më të lavdishme të Ushtrisë Çlirimtare të Kosovës. Në këtë përvjetor ne nderojmë përjetësisht figurën shumëdimensionale, unike e të papërsëritshme të Agim Ramadanit; nderojmë dhe kontributin e gjurmët e tij të pashlyeshme në rrugëtimin për liri e shtet-ndërtim”, thuhet në postimin e Abdixhikut.
Tutje, kryetari i LDK-së ka shkruar se më 11 prill lufta mori strategun më të mirë të kohës, duke iu referuar Agim Ramadanit, teksa ka thënë se Kosova e pavarur, ishte ëndrra e 114 dëshmorëve të Brigadës 138, të udhëhequr pikërisht nga heroi i rënë.
“Në agimin e 11 prillit, në vend se t’i gëzoheshim rrugëtimit drejt çlirimit të Kosovës, lufta na e mori strategun më të mirë të kohës, luftëtarin e Heroin e Kosovës, Agim Ramadani, atje skaj bjeshkëve të ashpra ku edhe pushon përjetësisht trupi i tij. Kumti i trishtueshëm që në vijat e para të frontit në Koshare, ra Agim Ramadani; nuk i ligështoi shokët e luftës. Ata tashmë kishin motivin për të vazhduar deri në çlirim. Kosova e pavarur, ishte ëndrra e të 114 dëshmorëve të Brigadës 138 të udhëhequr nga Agim Ramadani që tashmë po shkruanin me sakrificën e tyre njërën prej rrëfimeve më të madhërishme të luftës për liri e pavarësi”, thuhet tutje në postimin e Abdixhikut.
Në përfundim, kryetari ka deklaruar se Agim Ramadani ishte gjithmonë në krye të detyrës dhe i paepur për liri e çlirim./teve1.info/.
