Ndeshja e parë çerekfinale e Ligës së Kampionëve mes Real Madridit dhe Manchester Cityt nuk ka nxjerr fitues.
Dueli i luajtur të martën mbrëma në stadiumin “Santiago Bernabeu” ka përfunduar me rezultatin 3:3 dhe gjithçka do të vendoset në ndeshjen e kthimit që luhet pas një javë në Angli.
Skuadra e Cityt e nisi mirë ndeshjen dhe qysh në fillim e zhbllokoi rezultatin. Në minutën e dytë, Bernardo Silva shënoi për epërsinë e Cityt por që nuk zgjati shumë.
Në minutën e 12-të, Reali barazoi shifrat me autogolin e Ruben Diasit kurse në minutën e 14-të kaloi në epërsi 2:1 me golin e realizuar nga Rodrygo.
Edhe në pjesën e dytë, u shënuan tre gola por City realizoi i pari dhe atë dy herë. Fillimisht, në minutën e 66-të, Phil Foden barazoi shifrat në 2:2 kurse në minutën e 71-të, Joshko Gvardiol e kaloi Cityn për herën e dytë në epërsi – 3:2.
Megjithatë, në minutën e 79-të, Reali sërish barazoi rezultatin me anë të Federico Valverdes dhe dueli i kthimit do të jetë i zjarrtë në “Etihad Stadium”.
