Kryetari i Zubin Potokut, Izmir Zeqiri ka akuzuar Listën Serbe se po manipulon qytetarët dhe se nuk dëshiron të merret me realitetin.
Ai duke folur për vendimin që Lista Serbe ka marrë për të bojkotuar votimin për shkarkimin e kryetarëve në veri, ka thënë se kjo parti është e ndikuar nga Serbia.
Zeqiri në një prononcim për Tëvë1, ka përsëritur qëndrimin e tij se votimi për shkarkimin e kryetarëve shqiptarë në veri nuk do të ketë sukses.
“Lista Serbe është organizatë e ndikuar nga Serbia, edhe gjithmonë kjo përpiqet me shpifje, edhe t’i mbanë qytetarët e vet, edhe të bënë propagandë me opinionin, sepse nuk dëshiron të merret me realitetin. Unë nga fillimi kam pas skepticizëm në ndonjë sukses tek ky lloj votimi që bëjnë serbët, sepse është një pakicë jo ata qysh mendojnë, dmth i fryjnë listat zgjedhore, kemi lista zgjedhore që me siguri ka shumë edhe të vdekur që nuk i kanë lajmëruar, sepse nuk i lajmërojnë, ka që nuk jetojnë këtu, nuk është numri sa janë thirrur këta gjithmonë. Kështu që nga fillimi e kam ditur që nuk do të ketë sukses”, ka thënë ai.
Zeqiri ka thënë se Serbia përmes Listës Serbe dhe grupeve kriminale po vazhdon të atakojë ligjin përmes qytetarëve që mund t’i bindin.
” Me gjithë mekanizmat, Serbia përmes Listës Srpska, dhe grupeve terroriste, kriminale, do të thotë janë përpjekur dhe akoma përpjekën për t’i bërë pengesa shtetësisë së Kosovës, të atakojnë ligjin, përmes qytetarëve eventualisht që mund t’i dëgjojnë thërrasin në bojkotime, thërrasin në sabotime, kjo shkon më shumë në dëmin e vet serbëve, që jetojnë nëpër këto zona”, ka thënë Zeqiri.
Votimi për shkarkimin e kryetarëve në katër komunat veriore do të mbahet më 21 prill.