Procesi i regjistrimit të popullsisë ka filluar sot në vendin tonë, ku për herë të parë pritet të përfshihen edhe dëmet e luftës së fundit. Disa kryetarë të komunave, kanë kërkuar që ky proces të shtyhet.
Kryetari i Drenasit, Ramiz Lladrovci, ka kërkuar që procesi i regjistrimit të popullsisë të shtyhet për të paktën edhe dy javë të tjera.
Lladrovci ka thënë se Agjencia e Statistikave të Kosovës nuk është përgatitur mjaftueshëm.
“Më vjen keq që sërish më duhet të përsëris fjalën time të 2 nëntorit kur edhe atëherë kemi shpreh ankesat për pa përgatitjet e ASK për këtë proces. Na kemi informacionet që gjithë anëtarët e Komisionit komunal për Regjistrim kanë marrë njoftim që regjistrimi është shty deri të hënën, sa është e vërtetë na e thuani ju këtu. Konkursi për regjistrues ende vazhdon”, ka thënë ai.
Lladrovci ka shtuar se komuna e tij ka mungesë të zyrtarëve të regjistrimit.
Po ashtu ai është shprehur se ka mungesë të informacionit dhe buxhetit për këtë proces.
“Unë nuk e di a kem të drejtë, por unë kisha thënë që me shty edhe 2 javë procesin e regjistrimit se e kemi vështirë me kry mirë edhe ju qysh po kërkoni edhe ne qysh po duam”, ka thënë Lladrovci.
Ndërsa kryetari i Komunës së Podujevës, Shpejtim Bulliqi, ka thënë se edhe kjo komunë ka pasur problem me numrin e zyrtarëve regjistrues.
E, Kujtim Gashi, nënkryetar i Prizrenit, ka pohuar se procesi në këtë komunë është shtyrë për të hënën.
“Në komunën e Prizrenit nuk ka fillu regjistrimi dhe është shty për të hënën. Kjo sigurisht për çështje teknike që nuk ka arrit”, ka theksuar Gashi.
