Kryeministri i Kosovës, Albin Kurti, ka përkujtuar Agim Hajrizin, Latif Berishën dhe Bajram Kelmendin në përvjetorin e vrasjes së tyre.
Kurti ka shkruar se serbët vranë tre veprimtarë shqiptarë, në Mitrovicë kryesindikalistin Agim Hajrizi, politikanin Latif Berisha, dhe në Prishtinë avokatin Bajram Kelmendi.
“Teksa aeroplanët e NATO-s nga qielli filluan bombardimin e caqeve të forcave serbe, si përgjigje ndaj krimeve të Serbisë së Millosheviqit në Kosovë, kriminelët serb vranë tre veprimtarë të njohur shqiptarë. Në Mitrovicë vranë kryesindikalistin Agim Hajrizi dhe politikanin Latif Berisha, e në Prishtinë vranë avokatin Bajram Kelmendi”,ka shkruar Kurti.
Kurti tha se Agim Hajrizi së bashku me nënën e tij dhe djalin u vra në shtëpinë e tij.
“Agim Hajrizi, sindikalisti i paepur, Kryetari i Kuvendit të Bashkimit të Sindikatave të Pavarura të Kosovës, kryetar i organizimit komunal në Mitrovicë në vitet e ’90-ta, u vra në shtëpinë e tij, bashkë me nënën Nazmije dhe të birin 11 vjeçar, Ilirin”, shkroi Kurti.
Sipas kryeministrit Kurti, Latif Berisha u vra në shtëpinë e tij në Mitrovicë.
“Latif Berisha, politikan e intelektual, kryetar i LDK-së në Mitrovicë, profesor universitar i historisë së letërsisë shqipe e autor i shumë studimeve, udhëheqës i pajtimit të gjaqeve, u vra nga forcat serbe në prag të shtëpisë së tij në Mitrovicë, në natën e 24 marsit”, tha Kurti.
Ndërsa, Bajram Kelmendi së bashku me dy djemtë e tij u rrëmbye me forcë nga shtëpia dhe u gjetën të vrarë më 26 mars të vitit 1999.
“Bajram Kelmendi, juristi i shquar dhe avokat aktiv në Këshillin për Mbrojtjen e të Drejtave dhe Lirive të Njeriut, u rrëmbye nga shtëpia bashkë me dy djemtë e tij, Kastriotin dhe Kushtrimin, nga policët serbë që i hynë dhunshëm në shtëpi në natën e 24 marsit 1999. Më 26 mars, ata u gjetën të vrarë”,ka shkruar Kurti./teve1.info/
