Kryeministri i Republikës së Kosovës, Albin Kurti, në takimin me disa nga të punësuarit nëpërmjet Masës 1.6. Mbështetja e Personave me Aftësi të Kufizuara, në Ditën Botërore të Sindromës Down shprehi interesimin e tij për përvojat e tyre në vendet e punës.
Po ashtu në takimin e kryeministri me Vjosa Asllani, Hanife Raci, Genc Beqiri dhe Agron Bilalli u bisedua për punën që bëhet në pesë qendrat e Down Syndrome Kosova, në Prishtinë, Prizren, Ferizaj, Mitrovicë dhe Gjilan, ku përfitues direkt të shërbimeve janë mbi 300 persona me sindromë Down dhe aftësi të tjera të kufizuara intelektuale.
“Jam shumë i lumtur që po ju mirëpres që të gjithëve në Zyrën e Kryeministrit, në Ditën Botërore të Sindromës Down, që na bën neve edhe më të vetëdijshëm për përgjegjësinë që kemi për të ofruar kushte e qasje sa më të barabartë e të dinjitetshme për të gjithë pa lënë asnjeri prapa. Jam i lumtur që po ju pres si të punësuar dhe jam i interesuar të di më shumë për përvojat tuaja në vendet e punës që keni”, tha ai.
Ndërsa, zëvendësministri i Ministrisë së Financave, Punës dhe Transfereve, Agon Dobruna, ritheksoi përkushtimin e MFPT-së për mbështetje të mëtejme për jetësimin e të drejtave për personat me Sindromën Down dhe ata me aftësi të kufizuara.
Në takim, siç thonë nga Zyra e Kryeministrit u theksua qëllimi i gjithëpërfshierjes dhe barazisë në edukim, për çfarë Qeveria ka punësuar 250 asistentë për fëmijë me nevoja të veçanta në shkolla, e deri në fund të mandatit planifikojnë t’i kenë 500.
U theksua se përderisa studimet janë bërë falas, janë ndarë bursa për 13 studente me aftësi të kufizuara. Ndërsa, nëpërmjet masës 1.6 Mbështetja e punësimit të personave me nevoja të veçanta, janë punësuar 239 persona, prej tyre 119 burra dhe 120 gra.
