Ministri i Mbrojtjes, Ejup Maqedonci, ka njoftuar se Kosova do t’i dërgojë mjete ushtarake Ukrainës.
Sot në takimin e Grupit të Kontaktit për Mbrojtjen e Ukrainës në Ramstein të Gjermanisë, Maqedonci ka theksuar që Kosova qëndron e palëkundur në mbështetjen e luftës ndaj popullit të Ukrainës.
“Sot në takimin e 20-të të Grupit të Kontaktit për Mbrojtjen e Ukrainës në Ramstein të Gjermanisë, theksova që Republika e Kosovës qëndron e palëkundur në mbështetjen e luftës së drejtë të popullit të Ukrainës dhe do të mbështesë atë deri në fitoren përfundimtare. Gjithashtu të pranishmit i njoftova për paketën e parë të mbështetjes ushtarake që do të dërgohet në Ukrainë gjatë javës së ardhshme e që përbëhet nga dhjetra kamiona taktik, automjete taktike dhe autoblinda ushtarake. Për më tepër, në fjalën time njoftova për koordinimin dhe përgatitjen e pakos së dytë mbështetëse ushtarake që përbëhet nga mijëra predha të mortajave që do të dërgohet së shpejti në Ukrainë me qëllim mbështetjen e njësive ushtarake të Ukrainës për rritjen e fuqisë së zjarrit indirekt”, thuhet në postimin e Maqedoncit.
Po ashtu, Maqedonci i ka informuar ministrat dhe përfaqësuesit e mbi 50 vendeve të Grupit të Kontaktit, për mbështetjen e FSK-së për trajnimin e trupave ukrainase në kuadër të Operacionit Interflex në Britani./teve1.info/.