Shefi i Grupit Parlamentarë të Partisë Demokratike të Kosovës, Abelard Tahiri ka deklaruar se PDK ka bërë një hulumtim sa i përket kontratave sekrete dhe njëburimore përgjatë qeverisjes së Vetëvendosjes.
E që sipas Tahirit, këto kontrata janë realisht burim i korrupsionit, raporton teve1.info.
“Si Grup Parlamentarë në hulumtimin që kemi bërë në shtatë institucione del që vlera totale për vitin 2022 dhe 2023 në këto shtatë institucione është rreth 153 milionë e 889 mijë e 875 euro e 90 cent, pra janë 220 kontrata. Ato që realisht kanë qenë problematike gjatë kohës së Qeverisë Kurti janë dy lloj të kontratave që realisht janë burim i korrupsionit. Për një lloj kemi shifra konkrete derisa për një lloj tjetër të kontratave, ato sekrete ne nuk dimë asgjë”, tha Tahiri në Kuvendin e Kosovës.
Për këtë çështje Tahiri tha se ekziston një arsyeshmëri e mjaftueshme që të formohet një komision hetimorë për hetim parlamentarë mbi këto kontrata
“Kjo është më se e qartë që kemi një arsyeshmëri të mjaftueshme që ta nisim një komision hetimorë për ta bërë një hetim parlamentarë mbi këto kontrata. Pra po flasim rreth 220 kontrata njëburimore të cilat duhet ta kemi një komision hetimorë parlamentarë për t’i hetuar të gjitha këto kontrata. Ne do të kërkojmë që rezoluta e prezantuar nga Lidhja Demokratike e Kosovës të plotësohet edhe me një pikë, që kjo pikë pikërisht të jetë komisioni hetimorë që Grupi Parlamentar i PDK-së ka kërkuar që të formohet dhe t’i hetojë të gjitha këto kontrata”, tha ai.
Madje sipas Tahirit, Prokuroria e vendit ka material të mjaftueshëm të elementeve penale në këto kontrata.
“Unë mendoj se me aq sa kemi pa në hulumtimin tonë në 220 kontrata, ka material të mjaftueshëm për Prokurori dhe mendoj që hetimi parlamentar do t’i kanalizojë qartë dhe do ti procedojë në Prokurori të gjitha ato kontrata të cilat shohim se ka arsyeshmëri të mjaftueshme që ka elemente penale të cilat duhet të hetohen”, shtoi Tahiri.
Ndryshe edhe deputetja e Lidhjes Demokratike të Kosovës, Hykmete Bajrami, tha se kontratat njëburimore janë burim i korrupsionit.
Gjatë paraqitjes së pikës së vetme në seancën parlamentare të sotme, e cila ka të bëjë me Shqyrtimin e Propozim-rezolutës për numrin e madh të kontratave njëburimore të nënshkruara gjatë mandatit të Qeverisë Kurti, Bajrami tha se këto kontrata janë ndërhyrje e shtetit në ekonominë e tregut./teve1.info./