Gjykata Themelore në Ferizaj – dega në Kaçanik, është përfshirë nga zjarri ditën e sotme.
Gentiana Hoxha, zëdhënëse e kësaj gjykate, ka thënë se materialet e djegura janë lëndë të gjykatës.
Hoxha më tej, ka njoftuar se është formuar komisioni i vlerësimit të dëmit.
Ndërsa, ajo ka theksuar se lëndët e djegura gjenden edhe në sistemin elektronik, prandaj ato mund të rikuperohen.
“Materialet sigurisht kanë qenë lënde të gjykatës, por për këtë mund të ia bëjmë të ditur publikut se e kemi bërë një komisionin për vlerësimin e dëmit dhe mund të ia bëj më dije publikut se lëndët të cilat janë dëmtuar gjenden edhe në sistemin elektronik dhe të gjitha ato do të rikuperohen”, është shprehur ajo para medieve.
Ndryshe, lajmin për djegien e kësaj gjykate e konfirmuar më herët për teve1.info, zëdhënësi i policisë për rajonin e Ferizajt, Kanun Veseli, i cili tha se zjarri është lokalizuar dhe si pasojë e tij janë dëmtuar dy zyre.
“Ju njoftojmë se me datën 13.03.2024 rreth orës 03:55 kemi pranuar një informatë se në Objektin e Gjykatës Themelore- dega në Kaçanik ishte një zjarrvënie. Menjëherë në vendin e ngjarjes kanë dalë ekipe të Zjarrfikësve të cilët rreth orës 04:40 kanë lokalizuar dhe shuar zjarrin. Si pasojë e këtij incidenti nga zjarri janë dëmtuar dy zyre të kësaj gjykate”, ka thënë ai. /teve1.info/
