Kryeministri i Kosovës, Albin Kurti, tha se Qeveria e Kosovës sot i ka dhënë të drejtë Agjencionit Kadastral që ta zbatoj vendimin e Gjykatës Kushtetuese të Kosovës për Manastirin e Deçanit, raporton teve1.info
Në fjalën hyrëse në mbledhjen e Qeverisë, Kurti tha se po ashtu ministrja e Jashtme Donika Gërvalla, i ka dërguar notë verbale Këshillit të Evropës e cila më 22 mars pritet ta mbaj mbledhjen e jashtëzakonshme për anëtarësim të Kosovës, e cila do të pasoj me mbledhjen e asamblesë parlamentare në prill dhe Këshillin e ministrave i cili vendos për anëtarësimin e Kosovës në fund të majit.
“Qeveria e Kosovës i ka dhënë të drejtë sot Agjencionit Kadastral që ta zbatoj vendimin e Gjykatës Kushtetuese, ministrja e Punëve të Jashtme, Donika Gërvalla i ka dërguar notë verbale Këshillit të Evropës, më 22 mars është mbledhja e jashtëzakonshme atje, në prill asambleja parlamentare dhe në fund të majit këshilli i ministrave që vendos për anëtarësimin tonë”, tha Kurti.
Megjithatë, Kurti tha se ai vendim nuk i pëlqen dhe sipas tij është i padrejtë. Por shtoi se Kosova është dashur të zgjedh mes vendimit të Gjykatës Kushtetuese dhe anëtarësimit të Kosovës në Këshill të Evropës.
“Nuk na pëlqen ai vendim i çuditshëm e i padrejtë e ndërkohë ka edhe procese tjera gjyqësore pezull për këtë çështje, teksa ne si qeveri nuk kemi mjete legale e juridike për ta anuluar vendimin e Gjykatës Kushtetuese. Nuk do ndryshoj mendimin për këtë vendim të dëmshëm e padrejtë asnjëherë, ndërkohë nuk ka dyshim se anëtarësimi i Kosovës në Këshillin e Evropës është jo vetëm fitore historike por edhe hap gjigant për republikën tonë drejt njohjes së pesëshes evropiane që mundëson anëtarësimin e Kosovës në NATO dhe BE”, u shpreh Kurti.
Kryeministri Kurti tha se në këtë vendim është prirë nga arsyeja e shëndoshë pasi askush nuk ka të drejtë t’ia ndal Kosovës të jetë e barabartë me çdo shtet tjetër të kontinentit.
“Në ushtrimin e gjykimit për këtë çështje jam prirë nga arsyeja e shëndoshë, askush nuk ka të drejtë t’ia ndal të drejtën Kosovës për të qenë shtet i barabartë me çdo shtete tjetër të kontinentit tonë. T’ia humbas të drejtën që të ndihen qytetarë evropian duke pas të drejtë për t’iu qas Gjykatës Evropiane për të Drejtat të Njeriut e dhjetëra mekanizmave të tjerë që e përbëjnë makinerinë demokratike panevropiane të Këshillit Evropës”, u shpreh Kurti.
