Ministrja e Drejtësisë, Albulena Haxhiu, ka bërë homazhe te Memoriali Heroinat në nderim të jetës, veprës dhe sakrificës së shumë grave të Kosovës gjatë luftës së fundit 1998-99 kundër shtetit okupator, Serbisë.
Përmes një postimi në Facebook nga Lëvizja Vetëvendosje, Haxhiu duket se ishte e shoqëruar nga nënkryetarja, Mrika Limani Myrtaj, nënkryetarja e Kuvendit, Saranda Bogujevci, deputetë e aktivistë.
“Kryetarja e Organizatës Gratë për VETËVENDOSJE!, Ministrja e Drejtësisë, Albulena Haxhiu bashkë me nënkryetaren e Lëvizjes, Mrika Limani Myrtaj, nënkryetaren e Kuvendit, Saranda Bogujevci, deputetet e Republikës së Kosovës dhe aktiviste të Lëvizjes bënë homazhe te Memoriali Heroinat në nderim të jetës, veprës dhe sakrificës së shumë grave të Kosovës gjatë luftës së fundit 1998-99 kundër shtetit okupator, Serbisë. Vuajtjet e të gjitha atyre grave që përjetuan tmerrin e dhunës seksuale kanë goditur zemrat e të gjithë neve, për të mos i harruar kurrë, dhe për të kërkuar drejtësi për krimet e shkaktuara ndaj tyre”, ka thënë Haxhiu.
Po ashtu, ajo ka theksuar se Memoriali Heroinat, është vend ku nuk përkujtohet vetëm sakrifica për liri e çlirim nga pushtuesi, por edhe domosdoshmëri e barazisë shoqërore./teve1.info/.