Kryetari i PSD-së, Dardan Molliqaj, ka kërkuar lirimin e aktivistëve të arrestuar, pas aksionit simbolik në Bibliotekën Kombëtare – ku po prisnin ministren e Arsimit, Arbërie Ngavci, për t’ia dhënë “librezën e notave”.
Molliqaj ka thënë se deri më sot, ministrja Nagavci, ka arritur rezultate të mangëta në shumicën e lëndëve dhe sipas tij, shembullore është treguar vetëm në shkelje të Kushtetutës.
Tutje, ai ka kërkuar përjashtim të menjëhershëm nga Qeveria.
“Si udhëheqëse e Ministrisë, Arbërie Nagavci ka kontribuar palodhshëm në dështimin e përgjithshëm të sistemit arsimor, që nga çerdhet e reja, furnizimi me kohë me libra shkollorë, rezultatet në PISA e deri tek sjellja e saj me Sindikatën e Arsimit. Të gjithë dështimin e ka të mbështjellur shkëlqyeshëm me shkelje të Kushtetutës. Nuk janë disa dështime. Është një dështim i tërë e në kurriz të sistemit arsimor!Rekomandimi është i qartë dhe ka urgjencë:Përjashtimi i menjëhershëm nga Qeveria”.
“Me këso nota në shkollë e përseritë vitin, por ne urojmë që ministrja Nagavci të mos e përsëritë dështimin e saj as në këto muajt e mbetur të mandatit dhe aq më shumë kërkojmë që Qeveria mos të i’a shndërrojë në nota kaluese dështimet përmes intervenimeve të dhunshme të policisë në kumtime të qeta të suksesit të minsitrës, të formës së aktivizmit politik Kërkojmë lirimin e menjëhershëm të aktivistëve Teutë Rrusta, Nol Nushi, Gëzon Kastrati, Zgjim Hyseni, Natyra Kuçi, Behar Retkoceri, Lisjan Perolli, Eliot Hashimi, Frashër Krasniqi”, ka shkruar ai.
Policia e Kosovës ka arrestuar disa prej anëtarëve të PSD-së, të cilët kanë rezistuar të dalin nga Biblioteka Kombëtare.
Ata kanë penguar fillimin e manifestimit për 7 Marsin – Ditën e Mësuesit, ku do të marrë pjesë edhe kryeministri Albin Kurti.