Komuna e Suharekës ka vendosur që të ndalojë dhuratat e shtrenjta mësuesve. Për 7 dhe 8 mars, mësimdhënësit mund të pranojnë vetëm lule ose libra. Ky vendim është mirëpritur nga mësimdhënësit e Suharekës, pasi sipas tyre eliminon pabarazinë në shkollë.
Qaforen që mban në fyt është dhurata më e shtrenjtë që mori nga nxënësit.
Mësimdhënësja e shkollës “ Shkëndija” në Suharekë Afërdita Bytyqi, e kishte marrë këtë dhuratë në ditëlindjen e saj.
Në karrierën mbi 20 vjeçare të arsimtares në sistemin e arsimit, ajo thotë se asnjëherë nuk ka pranuar të marrë dhuratë të cilat janë të kushtueshme.
E së fundmi mësimdhënësit në komunën e Suharekës e kanë të ndaluar të pranojnë dhurata të shtrenjta.
Përveç një lule ose një libër, dhuratat tjera ndalohen të dhurohen për datat festive 7 dhe 8 mars.
Ky vendim është i qëlluar sipas arsimtares Aferdita Bytyqi.
Edhe mësuesja Sahadete Elshani ka mirëpritur këtë vendim të Drejtorisë së Arsimit.
Elshani thotë se gjithnjë ka kërkuar nga prindërit që për 7 dhe 8 mars të mos blejnë dhurata të shtrenjta.
Vendimi është duke u mirëpritur edhe nga drejtori i shkollës.
E drejtori i Arsimit në Komunën e Suharekës, tregon arsyet se pse mori këtë vendim.
Përveç Komunës së Suharekës, të martën edhe Komuna e Istogut ka ndaluar dhuratat e shtrenjta për 7 mars.
