Blerta Deliu-Kodra nga Partia Demokratike e Kosovës (PDK), ka akuzuar partinë qeverisëse për korrupsion, duke cilësuar se tashmë Kosova është peng e një qeverisje korruptive.
Fillimisht, deputetja opozitare përmendi arrestimin e kryeshefit ekzekutiv të Kompanisë Rajonale të Ujësjellësit në Gjakovë, Hasan Krasniqi, i cili u arrestua në Bullgari pasi që i njëjti po kërkohej nga INTERPO-i.
Ajo tha se personi i arrestuar është njeri i LVV-së.
Gjithashtu, ajo përmendi disa nga zyrtarët e kësaj partie, që sipas saj janë të përfshirë në afera korruptive.
Mes tjerash, ajo ka përmendur edhe ambasadorin e Kosovës në Kroaci, Martin Berishaj, i cili tha se është përfshirë në një skandal të madh rajonal financiar.
“Sot, Kosova jonë është peng e një qeverisje korruptive, është peng e një qeverisje të paaftë që po dëmton buxhetin e shtetit, mirëqenien e qytetarëve, po dëmton të ardhmen evropiane të Kosovës dhe aleancat tona historike”, tha ajo në një konferencë për media.
Deputetja opozitare tha se partia e saj kërkon shpërbërjen e Kuvendit të Kosovës si dhe zgjedhje të parakohshme.
“PDK tashmë ka kohë që po e kërkon shpërbërjen e Kuvendit dhe zgjedhjet e reja të parakohshme sa më parë. Po ashtu, PDK inkurajon dhe mbështet të gjitha organet e drejtësisë që të trajtojnë me seriozitet të plotë të gjitha aferat me të cilat tash e sa kohë po përballet kjo qeveri dhe zyrtarët e saj”, deklaroi ajo./teve1.info/
