Ka përfunduar greva e punëtorëve të Qendrës së Studentëve në Prishtinë pasi punonjësit janë marrë vesh për shumën e pagës dhe kushtet tjera të punës me punëdhënësin, raporton teve1.info
Lajmin për teve1.info e konfirmoi kryetari i Punëtorëve të Sektorit Privat në Kosovë, Jusuf Azemi, i cili tha se sot nuk do të publikohet shuma e pagës që u është ofruar punëtorëve për ndërprerje të grevës, por shtoi se janë plotësuar mbi 70 për qind e kushteve të kërkuara.
Ndërsa, sa i përket punëtorëve të sektorëve të njëjtë në Universitetin e Prishtinës, Azemi tha se ende nuk ka marrëveshje me këtë institucion, derisa shtoi se ekziston rreziku edhe i ndaljes së pagës për kohën e grevës.
Megjithatë, Azemi tha se nëse do t’u paguhen pagat punëtorëve për pjesën e grevës apo jo, do të pritet deri të hënën pasi akoma nuk janë paguar dhe me ligj mund të presin deri më datën 5 të muajit.
Lidhur me këtë, Azemi ka shkruar edhe në llogarinë e tij në Facebook.
“Greva në Qendrën Studentore mbyllet në bazë të vendimit për rritje të pagës kjo rritje fillon menjëherë. Të gjithë punëtorët unanimisht votuan për fillimin e punës dhe nga ora 10 gjithçka është normale. Kurse tani në UP po vazhdon greva pa asnjë sinjal se ajo do të përfundoi së shpejti,nga shqetësimet tani punëtorët po dërgohen në spital dhe kryesisht janë me tension të lartë, qarkullojnë lajme jozyrtare se për ditët në grevë nuk do të paguhemi, ne ju bëjmë me dije se çdo shkelje e ligjit mbi grevat nga ana juaj neve na e imponon që të radikalizohemi e që ne se dëshirojmë”, ka shkruar ai.