Kryetari i Sindikatës së sektorit privat në Kosovë, Jusuf Azemi, tha se tash e tri ditë prej se janë futur në grevë mbi 250 punonjës të sigurimit dhe mirëmbajtjes në UP dhe QS, asnjë nga përfaqësuesit e institucioneve të Kosovës nuk janë interesuar për kërkesat e tyre, raporton teve1.info
Në emisionin “Ditari” në Tëvë1, Azemi tha se kërkesës së punëtorëve për rritje të pagës në 400 euro, deri më tani nuk iu ka përgjigjur askush nga institucionet përgjegjëse të Kosovës, qoftë Rektorati i UP-së apo Ministria e Financave.
Azemi tha se po ta kishte emrin Jovan apo Stojan, duke aluduar që nëse do t’i përkiste komunitetit serb në Kosovë, do të ftohej nga përfaqësuesit e Qeverisë për t’u informuar me kërkesat e tyre.
“Ta kisha emrin Jovan ose Stojan deri tash më kishin thirr, nuk kemi përgjigje as ftesë nga askush prej institucioneve”, u shpreh Azemi.
Megjithatë, ai shtoi se do të dialogoj me të gjithë përgjegjësit për marrëveshje për të dalë nga greva, por tha se e vetmja çështje që nuk dialogohet është paga prej 400 eurove, sa po kërkojnë punëtorët.
“Ne u kemi thënë ulemi, bisedojmë. Kompromis te paga mos kërkoni sepse nuk ka”, u shpreh Azemi.
Kryesindikalisti i sektorit privat në Kosovë, Jusuf Azemi, foli edhe për zëvendësimin e punonjësve të pastrimit dhe sigurimit fizik në Qendrën e Studentëve, ku kompania kontraktuese në ditën e dytë të grevës i ka dërguar punonjësit e rinj për ti zëvendësuar me grevistët.
Sipas Azemit, kompania në fjalë ka tentuar që me 3-4 punëtorë të kryej shërbimet e pastrimit dhe mirëmbajtjes, derisa shtoi se një gjë të tillë e sanksionon Ligji mbi Grevën.
“Është tentuar që me 3-4 punëtorë të kryejnë shërbime të cilat i kanë kryer këta punëtor po ligi mbi grevat e sanksionon shumë mirë që derisa punëtorët janë në grevë askush nuk guxon të bëjë veprime të tilla”, u shpreh Azemi.
Ai madje shtoi se ka qenë në konvikte, i ka fotografuar punëtorët e rinj dhe nëse i kërkohen prej Inspektoratit të Punës, ato dëshmi do t’ia ofroj.
Azemi tha se tashmë është caktuar edhe inspektori i Punës i cili do të merret me këtë çështje dhe tha se shpreson që deri ditën e hënë do të ketë një raport nga inspektorati i Punës.
Nëse nuk plotësohen kërkesat e grevistëve, Azemi tha se do të dorëhiqen të gjithë punëtorët.
Grevën e tyre me kërkesë rritjen e pagës Azemi tha se e ka mbështetur edhe Sindikata e Universitetit të Prishtinës dhe një grup i studentëve të Qendrës së Studentëve të cilët e kanë nënshkruar një peticion për këtë çështje.
