Ish-komandanti i Ushtrisë Çlirimtare të Kosovës (UÇK) Fatmir Humolli, ka komentuar vendimin e pritshëm të Gjykatës Speciale në Hagë për katër ish-krerët e UÇK-së.
Në emisionin “Info Nata” në Tëvë1, Humolli ka deklaruar se nuk pret befasi nga vendimi i gjykatës, të cilën ai e konsideron politike.
“Duke pasur parasysh që është një gjykatë politike, e cila është ndërtuar me presion politik të shteteve të fuqishme ndërkombëtare, që u kanë bërë presion deputetëve të Kosovës për ta ulur dinjitetin e institucioneve tona dhe për ta dëmtuar drejtësinë, është e vështirë të presësh drejtësi nga një gjykatë politike. Tash unë e shoh vetëm nga ky kënd: është gjykatë politike dhe nuk është befasi çfarëdo që ndodh”, ka thënë Humolli.
Megjithatë, ai ka shprehur dëshirën që katër ish-krerët e UÇK-së të shpallen të pafajshëm.
“Dëshira ime është që ata të lirohen, por nuk mjafton vetëm dëshira. Institucionet tona nuk kanë qenë të përgjegjshme që nga ndërtimi i kësaj gjykate për të ndërtuar mekanizma që të mos lejojnë që kjo gjykatë të jetë kundër interesave të shtetit të Kosovës dhe luftës së Kosovës”, është shprehur ai.
Humolli ka kritikuar edhe klasën politike në Kosovë, duke e cilësuar si të papërgjegjshme për mënyrën se si është trajtuar çështja e Gjykatës Speciale.
Sipas tij, institucionet e Kosovës nuk kanë ushtruar presion të mjaftueshëm ndaj shteteve perëndimore që kanë mbështetur themelimin e kësaj gjykate.
“Institucionet tona, në mënyrë të vazhdueshme, e kanë injoruar këtë çështje dhe nuk kanë qenë në gjendje t’u bëjnë presion shteteve perëndimore, të cilat kanë bërë presion për ndërtimin e kësaj gjykate. Kjo për arsye se dukej sikur kishin pasur dëshirë që ish-krerët të dënoheshin. Institucionet kanë qenë të papërgjegjshme, pa dallim, në kuptimin politik”, ka shtuar ai.
Ndërkaq, duke komentuar paralajmërimin e Ambasadës Amerikane për mundësinë e protestave më 16 shtator, Humolli ka thënë se nuk mund të spekulojë nëse amerikanët kanë informacion për një vendim të mundshëm të gjykatës.
“Zakonisht, Ambasada Amerikane kujdeset për qytetarët e vet dhe në çdo moment e kanë parasysh që mund të ndodhë ndonjë problem në situata të caktuara. Unë nuk mund të merrem me spekulime se amerikanët e dinë saktë nëse ata kanë me u dënuar ose jo, por unë vetëm mund të vij në përfundim që amerikanët dhe shtetet evropiane kanë përgjegjësi për Gjykatën Speciale, e cila na ka poshtëruar si komb. Ata e kanë ndërtuar një gjykatë duke u arsyetuar se shteti serb do të ndihej i lirë nëse dënohen ushtarët tanë, por ata po i ndihmojnë një shteti kriminal. Pra, në vend që ta dekriminalizojnë shtetin serb, ata po e ndihmojnë që shteti serb të ndërtohet mbi baza të krimit të organizuar, sikur që është rasti i fundit me varrosjen e kriminelit Ratko Mlladiq”, ka theksuar Humolli.
Ai ka akuzuar shtetet perëndimore se, sipas tij, po ndihmojnë në rehabilitimin e Serbisë, ndërsa ka kritikuar edhe qasjen e klasës politike kosovare.
“Këto shtete perëndimore bashkëpunojnë me një shtet kriminal, i cili ende i mbështet qeveritarët, ndërkohë që këta qeveritarë e dinë saktë se ku janë kufomat tona, fëmijët tanë të zhdukur etj. Kjo sjellje e shteteve perëndimore është me qëllim për ta rehabilituar Serbinë. Klasa jonë politike është treguar naive dhe naiviteti i tyre ka bërë që ne sot të diskutojmë nëse po dënohen krerët e UÇK-së apo nuk po dënohen”, ka përfunduar ai.
Ndryshe, më 16 shtator, pas më shumë se dy vjetësh gjykim, Haga do t’i japë Kosovës një verdikt për katër nga figurat më të njohura të luftës së saj: Hashim Thaçin, Rexhep Selimin, Kadri Veselin dhe Jakup Krasniqin.
Ata akuzohen për krime lufte dhe krime kundër njerëzimit – akuza për të cilat janë deklaruar të pafajshëm./teve1.info/
