Zëvendëskryeministri Besnik Bislimi, tha se Qeveria i ka ofruar rreth 2 mijë vende të punës për qytetarët e komunitetit serb në komunat veriore të Kosovës të cilat do t’i subvencionoj deri në 70 për qind të pagës, derisa shtoi se nëse ka kërkesë, ky numër do të rritet edhe për 2 mijë vende tjera, raporton teve1.info
Gjatë tryezës me temën “Zhvillimi ekonomik për serbët në Kosovë”, të organizuar nga Qendra për Dialog Humanitar, Bislimi tha se strategjia e Qeverisë së Kosovës për zhvillimin e këtyre komunave është e njëjtë sikurse ajo e paraparë për të gjithë popullin e Kosovës.
“Kontributi më i mirë që mund të bëjmë që edhe çështjen e integrimit të komunitetit joshumicë ta trajtojmë me të njëjtin kriter siç është për të gjithë popullatën e Kosovës. Për zhvillimin ekonomik në komunat me popullatë shumicë të komunitetit serb i kemi paraparë disa hapa: Hapi i parë, mbështetja që u ofrojmë ndërmarrjeve, qoftë si shoqëri aksionare qoftë të ndërtuara nga vet punësimi i ndërmarrësve të vegjël. Përmes programeve me grante dhe subvencione në veri ku kanë prezantuar platformën e re ministri Hekuran Muratii dhe Elbert Krasniqi, me të cilën synohet krijimi i mbi 2000 vendeve të punës duke subvencionuar deri 350 euro apo 70 për qind të pagës, kemi marrë pritshmëri shumë të mira. Potenciali për vende të reja të punës është, nëse ka interesim për më shumë vende të punës kjo masë mund të zgjerohet edhe për 2000 vende tjera”, tha Bislimi.
