Kryeministri i Kosovës, Albin Kurti, në seancën solemne në Kuvendin e Kosovës për nder të 16 vjetorit të Pavarësisë tha se çdo ditë marrin masa për të ndërtuar shtet ligjor, si dhe për të përforcuar demokracinë.
Kurti tha se populli i Kosovës nuk e negocion ekzistencën, lirinë dhe të drejtën për t’u mbrojtur e zhvilluar.
“Republikës i dalim zot të gjithë, secili e secila bashkë… Ne nuk e negociojmë ekzistencën tonë, lirinë tonë dhe të drejtën tonë për t’u mbrojtur e zhvilluar. Prandaj, përditë si Qeveri e Kosovës marrim masa për të ndërtuar shtetin ligjor, për të forcuar demokracinë dhe llogaridhënien për të përfshirë dhe për të ndihmuar të gjithë qytetarët pavarësisht prej etnisë apo gjinisë së tyre”, tha ai gjatë fjalimit.
Kryeministri tha se Kosovën e kanë pjekur para kohe kryengritjet për bashkimin e vilajeteve dhe pavarësinë e Shqipërisë.
“Kosovën e kanë pjekur para kohe kryengritjet për bashkimin e vilajeteve dhe pavarësinë e Shqipërisë, atë e ka pjekur qëndresa e popullit tonë ndaj valëve të njëpasnjëshme të pushtimeve dhe gjenocideve…”.
Kurti u shpreh se nëse Serbia do të ndiente përgjegjësi për gjenocidin në Kosovë do ta njihte Pavarësinë qysh në vitin 2008.
“Të gjithë ne e kemi të qartë se në rast se Serbia shtetërore do të ishte ndierë sado pak përgjegjëse për gjenocidin në Kosovë. Nëse në politikën e saj do të kishte mbizotëruar arsyeja dhe jo revanshizmi shovinist, ajo do të duhej ta kishte njohur Kosovën qysh në vitin 2008”, tha Kurti./teve1.info/
