Kryeministri i Kosovës, Albin Kurti, tha se 14 shkurti i vitit 2021 nuk është vetëm përvjetori i fitores elektorale të Vetëvendosjes, por sipas tij është datë e përmbysjes më të madhe të politikës demokratike në Kosovën e pasluftës, raporton teve1.info
Kurti gjatë fjalës hyrëse në mbledhjen e Qeverisë, tha se kjo datë shënon revolucionin elektoral, ku sipas tij ngadhënjeu mirëqeverisja mbi korrupsionin e drejtësia mbi diskriminimin.
“Mbledhja e 188 e Qeverisë së Kosovës përkon me datën që shënon 3 vjetorin e fitores sonë historike të zgjedhjeve të vitit 2021, ndryshimit të madh demokratik, politik e shoqëror. 14 shkurti nuk paraqet vetëm përvjetorin e një fitoreje elektorale, 14 shkurti është datë e përmbysjes më të madhe të politikës demokratike në Kosovën e pasluftës. Është revolucioni elektoral, ku ngadhënjeu mirëqeverisja mbi korrupsionin, drejtësia mbi diskriminimin dhe interesi i përbashkët e publik mbi atë personal e privat”, tha Kurti.
Ai shtoi se për tri vite është dëshmuar se und të qeveriset me duar ta pastra.
“Për këto tri vite është dëshmuar se është e mundur të qeveriset në përputhje me vullnetin e popullit, me duar të pastra e duke ruajtur kushtetutshmërinë, ligjshmërinë dhe paqen e sigurinë. Vendi ynë për këto tri vite Ka qenë shembull i vërtetë i guximtit e vendosmërisë së popullit dhe qeverisë tij në përballje me sfida të mëdha që erdhën e kaluan njëra pas tjetrës”, deklaroi ndër të tjera Kurti.
