Ish-kryeshefi i KPM-së, Luan Latifi, është shpallur sot fajtor për kërkim dhe marrje ryshfeti. Ai u dënua me dy vite burgim dhe me gjobë prej pesë mijë euro.
E për këtë avokati i “Telkos”, në këtë rast palës së dëmtuar Naim Rudari, i ftuar në emisionin “Ditari ka vlerësuar se ky gjykim ka qenë relativisht i drejtë.
Por që sipas tij, aktakuza në fjalë nuk është ngritur e plotë dhe në përputhje me provat që kanë qenë në dispozicion.
“As unë e as operatori Telkos nuk ia dëshirojmë të keqen askujt, kjo pra ishte një e keqe e domosdoshme nga përfaqësuesit e KPM–së. Por meqenëse operatori ekonomik ka qenë palë e dëmtuar madje jashtëzakonisht e dëmtuar lidhur me këtë çështje në propocion me aktakuzën, gjykimi ka qenë relativisht i drejtë. Por ne kemi vlerësuar që nga fillimi që aktakuza nuk është ngritur e plotë në përputhje me provat që kanë pasur në dispozicion”, tha avokati Rudari.
Më tej, ai tha se përveç kësaj ka pasur prova që përfaqësuesit e KPM-së kanë kryer edhe vepra të tjera penale dhe shantazhe.
“Ne kemi vlerësuar se përfaqësues të KPM-së kanë kryer edhe vepra të tjera, jo vetëm veprën penale marrje ryshfeti. Do me thënë ka pasë prova në dispozicion që është kryer vepra penale keqpërdorim i pozitës, madje është kryer edhe vepra penale e shantazhit dhe vepra të tjera por prokuroria ka akuzuar përfundimisht drejtorin e financave dhe kryeshefin e KPM-së me veprën penale marrje ryshfeti. Dhe se vepra penale ka qenë në bashëkryerje fillimisht, ndonëse njëri drejtori i financave kishte pranuar fajësinë dhe çështja është veçuar padrejtësisht. Kemi konsideruar se është veçuar dhe ai është dënuar më parë dhe tani është dënuar edhe kryeshefi i KPM-së”, shtoi ai
Ndryshe, ndaj Latifit, Gjykata Themelore në Prishtinë, mori vendim edhe për ndalim të ushtrimit të funksionit publik në kohëzgjatje prej tre vitesh.
Kurse ish drejtori i Administratës së KPM-së, Arben Bilalli, kishte pranuar fajësinë në seancën fillestare, me ç’rast Gjykata Themelore në Prishtinë e dënoi me 140 ditë burgim efektiv dhe 12 mijë euro gjobë./teve1.info./
