Kryeministri i Kosovës, Albin Kurti, përmes një video mesazhi në gjuhën serbe ka thënë se fushata kundër rregullores së BQK-së, që ndalon qarkullimin e dinarit në Kosovës është ngritur mbi gënjeshtra.
Ai ka thënë se rregullorja e re nuk e ndalon Serbinë për t’i ndihmuar qytetaret serb në Kosovë dhe kush e thotë të kundërtën sipas tij bënë progandë dhe synon nxitjen e tensioneve ndër etnike.
“Banka Qendrore tregon qartë se euro është mjeti i vetëm i pagesës në Kosovë dhe se në këtë drejtim, çdo transaksion duhet të jetë në euro si valuta e vetme zyrtare në Kosovë. Rregullorja e Bankës Qendrore nuk e ndalon Serbinë që të ndihmojë financiarisht qytetarët e komunitetit serb në Kosovë. Çdo sugjerim për të kundërtën është propagandë e rreme që synon krijimin e tensioneve etnike. Rregullorja e Bankës Qendrore siguron ligjshmërinë dhe transparencën e parave të importuara në Kosovë, bazuar në Kushtetutën dhe politikën monetare të Bashkimit Evropian”, ka thënë Kurti në video mesazhin e tij të publikuar në Facebook, përcjell teve1.info
Ai është shprehur se Kosova nuk e ndalon dinarin sikurese nuk ka ndaluar as valutat tjera, por ka thënë se më nuk mund hyjnë përmes kufirit me thasë.
“Pra, Kosova nuk e ndaloi dinarin, ashtu siç nuk e ndaloi as dollarin, as funtën dhe as frangun zviceran. I vetmi ndryshim është se nga 1 shkurti, paratë nuk mund të kalojnë kufirin me thasë, siç nuk mund të bëhet në asnjë shtet demokratik, por mund të vijnë përmes llogarive bankare, të tërhequra në euro. Kjo politikë mbron qytetarët nga kërcënimet e krimit të organizuar, trafikimit me armë dhe pastrimit të parave. Deri më tani, mënyra e futjes dhe transportit të parave përtej kufinjëve u mundësonte grupeve kriminale të merrnin para të importuara ilegalisht, duke forcuar kështu ndikimin e tyre mbi popullin, duke frikësuar masat dhe duke inkurajuar kriminelët nga kreu i shtetit serb”, është shprehur Kurti ndër të tjera.
Kurti, i cili në seancën e Këshillimit të Sigurimit të OKB-së, kishte thënë se do tu drejtohet qëytetarëve dhe në gjuhën serbe, ka thënë BQK është e gatshme që përmes Bankës së Serbisë të ofrojë kushte dhe mundësi për konvertimin e parave.
Ai ka thënë se dërgimi i parave deri tash ka mundësuar financimin e grupeve kriminale, ndërsa ka thënë se duhet të kuptohet se vendosja e shtetit ligjor është e pashmangshme dhe se dërgimi i parave përmes transaksioneve bankare është i pakompromis.
“Gjëja më e rëndësishme është të kuptohet dhe besohet se vendosja e shtetit ligjor është e pashmangshme, dërgimi i parave përmes transaksioneve bankare është i pakompromis dhe gëzimi i të drejtave të fituara deri më tani në mënyrë të lirë, nga autoritetet shtetërore në Kosovë, është një pjesë e domosdoshme e garantimit të lirisë së të gjithë qytetarëve për të marrë çdo ndihmë financiare nga cilado palë apo autoritet që vjen përmes rrugëve ligjore”, ka thënë Kurti.
Bashkimi Evropian dhe Shtetet e Bashkuara të Amerikës kanë kërkuar që të ketë shtyrje të afatit të zbatimit të kësaj rregullore, duke u arsyetuar se duhet më shumë kohë për qytetarët serb që të njoftohen dhe të përgatiten.
