Kryetari i Prishtinës, Përparim Rama, e ka akuzuar PDK-në dhe VV-në për rastin e pronave në Badovc, duke thënë se kanë heshtur deri më tani, raporton teve1.info
Në fjalimin e tij para asamblistëve në mbledhjen e jashtëzakonshme e cila është thirr për anulimin e vendimit për këmbimin e pronave në Badovc, Rama ka thënë se po merr pjesë në këtë mbledhje me kërkesë të asamblistëve për ta shfuqizuar një vendim të cilin sipas tij e ka miratuar ky kuvend.
“Ky vendim ka rrjedh nga një proces i cili ka fillu nga qeverisja e kaluar, pra jo nga Përparim Rama. Për më tepër, ky proces ka rrjedh nga një numër i vendimeve të nivelit qendror, pra Ministrisë së Ambientit, Ministrisë së Financave dhe Ministrisë së Pushtetit lokal. Nga momenti që qeverisja jonë ka vazhdu këtë proces, janë ndjek të gjitha procedurat e parapara ligjore. Pra, për këtë çështje, janë dërgu pikat e rendit të ditës me kohë, përfshi këtë pikë për këmbim, nuk ka reagu askush; është diskutu në KFP, nuk ka reagu askush; është miratu në këtë kuvend, nuk ka reagu askush”, tha Rama.
I pari i kryeqytetit ka thënë se ka disa të pavërteta në këtë proces.
“Është raportu se kryeqyteti i ka dhënë 20 hektarë për 8 hektarë, nuk është e vërtetë. Vendimi i asamblesë së kryeqytetit e thotë qartë se prona 8 hektarëshë këmbehet me pjesë të parcelës 20 hektarëshe, e përsëris me pjesë të parcelës, jo me krejt parcelën. Sa tokë do të këmbehet, 10 ari, 50 ari, 2 hektarë apo 5 hektarë, nuk e përcakton kryeqyteti e as Përparim Rama, por e përcakton Ministria e Financave. Është thënë se Përparim Rama dhe qeverisja aktuale e kanë nisë këtë proces, prapë e pavërtetë. Si rezultat i vlerësimit nga Ministria e Financave në maj të vitit 2022, palës iu ka këmby vetëm një pjesë e parcelës dhe i ka mbet edhe një pjesë tjetër me u këmby, rrjedhimisht, pala ka bë kërkesë për vazhdim të procedurës, po e përsëris, vazhdim të procedurës, jo fillim të procedurës. Madje, pala ka akuzu kryeqytetin për neglizhencë në vazhdim të këtij procesi, ju lutem ta shihni procesverbalin zyrtar”, ka deklaruar Rama ndër të tjera.
Kryetari Rama e ka ftuar Prokurorinë që të zgjerohen hetimet lidhur me këtë rast.
“Keni kërku hetim nga prokuroria, unë i kam thënë po, janë të mirëseardhur, jo vetëm në institucion të kryeqytetit, por të zgjerohet edhe në Ministri të Pushtetit Lokal edhe në Ministri të Financave. Unë edhe kam kërku publikisht zgjerim të hetimeve në të gjitha nivelet. Prandaj, edhe sot, nga kjo foltore, e ftoj Prokurorinë Speciale të Republikës së Kosovës të zgjerojë hetimet edhe në MAPL dhe në Ministri të Financave dhe t’i shkoj deri në fund këtij procesi”, u shpreh Rama.
