Pakënaqësitë e tyre i shprehën vazhdimisht gjatë vitit të kaluar.
Pjesëtarët e Njësive Speciale të Kosovës por edhe të njësive tjera, protestuan dy herë para objektit të Qeverisë.
Ata iu drejtuan pushtetit me disa kërkesa, ku në theks ishin përmirësimi i kushteve dhe rritja e shtesave për rrezikshmëri e benefite tjera.
E një takim rreth mosrealizimit të këtyre kërkesave, pjesëtarët e të gjitha njësive e patën edhe të enjten në kampin e njësive speciale “Enver Zymeri” në Mitrovicë.
Kryetari i Sindikatës, Imer Zeqiri tregon se aty u diskutua lidhur me veprimet e mëtejme që do t’i ndërmarrin si rrjedhojë e mosreflektimit të Qeverisë.
Kryesindikalisti thotë është paraparë një takim me ministrin e Punëve të Brendshme, Xhelal Sveçla.
Sipas tij, nëse ky takim nuk realizohet atëherë do të diskutojnë mundësinë e protestave tjera.
Se këto kërkesa janë të arsyeshme, e thotë edhe ish-zv.ministri i Punëve të Brendshme, Valdet Hoxha.
Porse, ky vlerëson se deri tek hendeku mes Qeverisë e Policisë ka ardhur si pasojë e inateve politike.
Tëvë1 ka kërkuar përgjigje nga kjo Ministri se a është në plan që të realizohet një takim i tillë, por që deri në publikimin e kronikës nuk ka pasur përgjigje.
