Prokuroria Themelore në Gjakovë ka ngritur aktakuzë ndaj një inspektori të punës dhe ka kërkuar dënimin e tij për kryerjen e veprës penale “Keqpërdorim i pozitës apo autoritetit zyrtar”, raporton teve1.info
Sipas komunikatës së Prokurorisë në Gjakovë, i pandehuri N.A. në cilësinë e Inspektorit të Punës në Zyrën Rajonale në Gjakovë, ka keqpërdor detyrën e tij zyrtare duke i shkelur të drejtat e punësimit të dëmtuarës B.M..
“Prokuroria Themelore në Gjakovë, Departamenti për Krime të Rënda, ka ngritur aktakuzë, kundër të pandehurit N.A., për veprën penale “Keqpërdorimi i pozitës apo autoritetit zyrtar”, nga neni 414 paragrafi 1 të KPRK-së. Sipas aktakuzës, me dt.06.12.2022 në Gjakovë, i pandehuri N.A., në cilësinë e Inspektorit të Punës në Zyrën Rajonale në Gjakovë, keqpërdor detyrën e tij zyrtare duke tejkaluar kompetencat e tij, dhe duke i shkelur seriozisht të drejtat e punësimit të dëmtuarës B.M.”, thuhet në komunikatë.
Prokurori i çështjes me rastin e ngritjes së aktakuzës, i ka propozuar gjykatës që të pandehurin ta shpallë fajtor dhe të dënohet sipas ligjit për veprat penale të cilat i vihen në barrë.
Po ashtu Prokuroria ka kërkuar që të pandehurit N.A. ti shqiptohet dënimi plotësues – Ndalimi i ushtrimit të funksioneve në administratën publike ose shërbimin publik.
