Të enjten deputetët e Kuvendit të Kosovës, do t’i kthehen sallës plenare.
Por, edhe në sesionin e ri pranveror, votimin nuk pritet ta bëjmë përmes sistemit elektronik.
Kjo pasi këto pajisje tash e disa vjet, nuk janë funksionale.
E kjo sipas opozitës, po i dëmton punimet në kuvend.
“Nga viti 2019 apo 2020 e këndej, Kuvendi i Kosovës nuk ka asnjë evidencë se si kanë votuar deputetët, pra sot nëse e merr dhe do me ju referu një marrëveshjeje ndërkombëtare apo një ligj dhe do me ju referu se kush janë deputetë që kanë votuar pro, kanë abstenuar apo kanë votuar kundër…mendoj që është një papërgjegjësi e LVV-së, sepse e drejton Kuvendin”, tha Abelard Tahiri, Shef i Grupit Parlamentar të PDK-së.
E sipas Arbër Thaçit nga Instituti Demokratik i Kosovës, deputetët e kësaj legjislature asnjëherë nuk votuan në mënyrë elektronike.
“Tenderimi për këtë çështje është shpallur tri herë, në të tri rastet ka dështuar, pra edhe ky i herës së fundit i shpallur në dhjetor të vitit të kaluar. Gjë që e bën skeptike mundësinë e rregullimit të këtij problemi përgjatë kësaj legjislature, tha ai.
Sipas Thaçit, votimi tradicional në shumë raste krijon edhe paqartësi gjatë seancave plenare.
“Ka një lloj ngarkese të stafit administrativ, pasi edhe numërimi dhe çdo gjë përreth le të themi, vullnetit të deputetëve, duhet të matet fizikisht nga punonjësit e Kuvendit, kjo edhe e në rastet e pacaktuara krijon paqartësi për numrat kur votimi është i ngushtë”, shprehet Thaçi
Se kur deputetët pritet t’i kthehen votimit elektronik, Tëvë1 ka pyetur edhe në Kuvendin e Kosovës.
Por, pavarësisht pritjes, këta të fundit nuk kanë kthyer përgjigje.
