I ftuar në emisionin “Herët” në Tëvë 1, Cernjani theksoi se prapë se prapë ka ende punë për t’u bërë për këtë komunitet, ndër të tjerash edhe rishikimi i literaturave shkollore.
“Ne në Kosovë kemi dhe politika qendrore dhe lokale, si lloj dokumentacioni të cilët kanë të bëjnë me pozitën e këtij komuniteti, ku institucionet vendore dhe lokale duhet të japin mbështetjen e plotë në lidhje me zbatimin e këtyre dokumenteve. Mirëpo, prapë se prapë duhet të them që ka ende punë për të bërë në lidhje me këtë komunitet për arsye se nëse ndalemi dhe të fokusohemi te çështja e arsimit, një prej problematikave për momentin literatura shkollore është duke u ballafaquar, është mungesa e informacioneve për komunitetet tjera përveç atij shqiptar, në lëndën e historisë dhe edukatës qytetare”, tha Cernjani.
Ai u bëri thirrje institucioneve të Ministrisë së Arsimit që sa më shpejt të rishikojnë literaturat shkollore, dhe të përfshihen edhe komunitetet tjera jo shqiptare, në mënyrë që të zbehen paragjykimet dhe të ulet diskriminimi ndaj këtij komuniteti, shkruan teve1.info
Tutje, Cernjani shtoi se nuk është e mjaftueshme që për këtë komunitet të ofrohet përkrahje vetëm një ditë, e në ditët e tjera jo.
“Edhe ne jemi e asaj që për romët nuk duhet të punohet apo të ngritet zëri apo me u mbështet vetëm në Ditën Ndërkombëtare të Romëve dhe kjo ishte arsyeja që ne kemi konvertuar nëse mund të them, manifestimin vetëm në datën 08 prill dhe kemi krijuar javën rome, në mënyrë që të përcjellim edhe mesazhin që nuk është mjaftueshme që të ofrohet përkrahje vetëm një ditë, ndërsa 364 ditë të tjera të mos kemi mbështetjen apo përkrahjen e secilit akter. Mirëpo, prapë se prapë ndoshta kjo ditë duhet me qenë si një lloj rifreskimi i mendjeve tona në lidhje me prezencën e këtij komuniteti dhe fatmirësisht apo fatkeqësisht, ndoshta mund të them në thojza, që një përkrahje më e madhe i ofrohet këtij komuniteti pikërisht në ditën ndërkombëtare, si nga ana e institucioneve, si nga ana e akterëve medial, të cilët ofrojnë hapësira në lidhje me trajtimin e këtyre tematikave”, theksoi Cernjani. /Teve1.info/
