Ambasada e Republikës së Kosovës në Abu Dhabi, ka njoftuar se ende nuk ka hyrë në fuqi vendimi për lëvizjen pa viza në Emiratet e Bashkuara Arabe.
Përmes një njoftimi në Facebook, kjo ambasadë ka shkruar se sot është nënshkruar marrëveshja e mirëkuptimit mes dy shteteve për përjashtimin reciprok të kërkesave për viza hyrëse në Emiratet e Bashkuara Arabe.
Megjithatë, kanë bërë të ditur se qytetarët e Kosovës, ende janë të obliguar që të pajisen me viza hyrëse për të udhëtuar atje.
“Ambasada e Republikës së Kosovës në Abu Dhabi, ka kënaqësinë që të i njoftojë qytetarët e Republikës tonë se, pas vendimit për heqjen vizave, i dalë nga takimi i zhvilluar mes Presidentes së Republikës së Kosovës SHS. Dr. Vjosa Osmani Sadriu, dhe Presidentit të Emirateve të Bashkuara Arabe HH. Sheikh Mohamed bin Zayed Al Nahyan, sot është nënshkruar Marrëveshja e Mirëkuptimit mes Republikës së Kosovës dhe Emirateve të Bashkuara Arabe, për Përjashtimin Reciprok të Kërkesave për Viza Hyrëse në Emiratet e Bashkuara Arabe, për të gjithë qytetarët e vendit tonë bartës të pasaportës së Republikës së Kosovës. Deri atëherë, qytetarët e vendit tonë, para se të nisen në Emiratet e Bashkuara Arabe, janë të obliguar që të pajisen me viza hyrëse”, thuhet në postimin e tyre.
Po ashtu, kanë shkruar se për datën e hyrjes në fuqi të plotë të zbatimit të kësaj marrëveshjeje, Ambasada e Kosovës në Abu Dhabi, do t’i mbajë qytetarët të informuar me kohë./teve1.info/.
