Policia e Kosovës ka bastisur dy shtëpi, një në Prizren dhe një në Suharekë, ku ka gjetur dhe sekuestruar armë të llojeve të ndryshme, raporton teve1.info
Sipas raportit policor, në Suharekë është bastisur shtëpia e të dyshuarit mashkull me shtetësi të Kosovës ku është gjetur një pushkë automatike, një pushkë gjysmëautomatike, qindra fishekë dhe pajisje tjera për armë.
“Fsh. Vraniq, Suharekë 09.01.2024 – 09:00. Raportohet se gjatë kontrollit në shtëpinë e të dyshuarit mashkull kosovar janë gjetur dhe sekuestruar: një pushkë automatike AK-47 kal.7.62x39mm, tre karikatorë të pushkës automatike, një pushkë gjysmë automatike kal.7.62-dhjetëshe me dylbi si dhe dyqind e nëntë (209) fishekë kal. 7.62 mm. Pas intervistës në konsultim me prokurorin kujdestar i dyshuari është liruar në procedurë të rregullt”, thuhet në njoftim.
Ndërsa në rastin e dytë në Prizren, gjatë kontrollit në shtëpinë e të dyshuarit, po ashtu mashkull me shtetësi të Kosovës, policia ka gjetur pushkë, snajper,pistoletë e municion të ndryshëm.
“Rr. Mithat Frashëri, Prizren 09.01.2024 – 15:30. Raportohet se gjatë kontrollit në shtëpinë e të dyshuarit mashkull kosovar janë gjetur dhe sekuestruar: një pushkë automatike, një pushkë me snajper, një pushkë e gjuetisë, tre pistoleta dhe një sasi e municionit”, thuhet në njoftimin e Policisë.
