Bashkimi Europian po punon që në mesin e kushteve detyruese për Serbinë ta vendosë zbatimin e marrëveshjeve që i ka arritur deri tani me Kosovën në dialogun e ndërmjetësuar nga ajo.
Shumë herë u deklaruan publikisht.
Pavarësisht premtimeve në kuadër të dialogut, zyrtarët serbë theksuan se nuk do ta zbatojnë marrëveshjen në tërësi.
Kjo pasi disa nene të marrëveshjes për normalizim të raporteve me Kosovën, ata i konsideruan ‘’shkelje të interesave kombëtare’’ të Serbisë.
Por për herë të parë muajin e kaluar, kryeministrja e Serbisë, Ana Bërnabiq i konfirmoi të gjitha këto përmes një letre.
‘’Marrëveshja për rrugën drejt normalizimit të raporteve dhe Aneksi i zbatimit, siç i referohet në këtë deklaratë, konsiderohet e pranueshme vetëm në kontekstin në të cilin nuk përfshin de facto apo de jure njohjen e Kosovës. Kosova është pjesë integrale e Republikës së Serbisë nën administrim ndërkombëtar në përputhje me rezolutën 1244 të Këshillit të sigurimit të OKB-së’’, ka deklaruar kryeministrja serbe, Ana Bërnabiq.
E qëndrimet me shkrim nga Bërnabiq, i befasoi zyrtarët evropianë.
Prandaj këta të fundit filluan të merren masa.
Komisioni Europian dhe Shërbimi i Veprimit të Jashtëm i BE-së (EEAS) nisën punën për ndryshimin e kornizës së bisedimeve me Serbinë lidhur me anëtarësimin e saj në BE.
Në mesin e kushteve detyruese EEAS po tenton që të vendosë zbatimin e të gjitha marrëveshjeve që i ka arritur me Kosovën.
E kjo kërkesë për ndryshimin formal të kushteve u bë nga shtetet anëtare të BE-së.
“Puna në këtë drejtim po vazhdon në përputhje me kërkesën e vendeve anëtare. Pikërisht përfshirja e detyrimit për normalizimin e marrëdhënieve me Kosovën në kornizën e bisedimeve për anëtarësim në BE ishte përmendur nga zyrtarët e lartë të bllokut si mënyrë që marrëveshja e arritur në Bruksel më 27 shkurt dhe më pas më 18 mars në Ohër, aneksi për zbatimin e saj, të bëhen “ligjërisht të detyrueshme”, ka thënë zëdhënësi i BE-së, Peter Stano.
Ditë më parë, presidenti i Serbisë, Aleksandar Vuçiq, tha se Evropa po i kërkon Serbisë që ta njohë pavarësinë e Kosovës.
“De facto ose de jure. Kjo po kërkohet. Le të mos gënjejmë për këtë gjë. Fuqia më e madhe, Bashkimi Evropian po e kërkon këtë”, tha Vuçiq për mediat serbe në fundjavën e kaluar.
