Sulmuesi Timo Werner do të jetë përforcimi i parë i skuadrës së Tottenhamit në afatin kalimtar të janarit. Mediumet britanike kanë raportuar të martën se Werner gjatë kësaj jave do të prezantohet me fanellën e Tottenhamit.
Madje thuhet se Werner gjatë këtyre ditëve do t’u nënshtrohet kontrollimeve mjekësore pasi Tottenhami ka arritur marrëveshje me Leipzigun për shërbimet e tij.
Në fakt Werner do të huazohet për gjashtë muaj te Tottenhami me ekipin anglez që do ta ketë opsionin e blerjes së tij në verë për 18 milionë euro.
27-vjeçari ka kontratë me Leipzigun deri në vitin 2026, ndërsa në Angli ka qenë edhe pjesë e Chelseat për dy edicione.
Këtë edicion Werner ka dy gola dhe një asistim në 14 paraqitje në të gjitha garat për ekipin gjerman.
