Xhevdet Smakiqi, avokat i familjes Dakaj, familjari i së cilës, Hasan Dakaj u arrestuar të premten në Serbi, tha se arrestimi i ish-ushtarit të UÇK-së është arrestim politik dhe nuk ka të bëjë fare me aktakuzën, raporton teve1.info
Në emisionin “Ditari” në Tëvë1, Smakiqi tha se Dakaj e ka mohuar tërësisht akuzën e cila i është bërë, pasi për kohën të cilën është akuzuar nuk ka qenë fare në atë lokalitet dhe sipas avokatit e kanë ngatërruar edhe në identitet.
“Ka qenë ndalim politik dhe sipas deklarimeve që i ka dhënë Dakaj e ka mohuar në tërësi dyshimet dhe akuzën që i bëhet dhe fare nuk ka qenë në ato lokacione dhe nuk ka qenë as në atë lokalitet dhe e kanë ngatërruar edhe në identitet. Ne konsiderojmë që prokurori serb gabimisht e ka arrestuar dhe tash ai po i nënshtrohet kësaj procedure por ne mendojmë që kjo është taktikë serbe për ti penguar ish-ushtarët e UÇK-së që ta gëzojnë liberalizmin e vizave sepse është një kategori e cila e ka shporrur Serbinë në vitin 1999 si aleate e NATO-s bile po ta shikojmë nga ky ushtarët e UÇK-së konsiderohen edhe si aleancë e NATO-s dhe i bie që ata nesër mund ta arrestojnë edhe ndonjë ish-ushtarë të NATO-s në atë kohë”, tha Smakiqi.
Ai tha se Dakaj si ish-ushtar i UÇK-së është arrestuar vetëm pse ka qenë pjesë për ta larguar Serbinë nga Kosova.
“Vetëm pse ka qenë pjesë për ta larguar Serbinë sepse krimet e luftës, dispozita për të cilën e përdor prokuroria serbe, ato nuk parashkruhen dhe konsideroj që ka qenë ndalim politik, është ndalim politik dhe i kërkojmë institucioneve të Kosovës që të bëjnë më shumë për ta liruar zotin Dakaj. Dyshohet për një pjesëmarrje në një privim të paligjshëm të lirisë ndaj disa qytetarëve joshqiptarë thuhet dhe aty përdoret pjesëmarrja e tij si 19 vjeçar dhe dyshohet sipas nenit 142 të Ligjit penal të Ish-Jugosllavisë për një lokacion në rrethinën e Prizrenit për të cilin zoti dakja fare nuk ka qenë në atë kosh në atë rrethinë. Zoti Dakaj nuk ka operuar fare në atë pjesë dhe kjo i bie që e kanë ngatërruar me dikë tjetër, nuk janë prova që e identifikojnë zotin Dakaj”, u shpreh avokati Smakiqi.
Ai tha se ish ushtari i UÇK-së, Hasan Dakaj aktualisht gjendet në qendrën e paraburgimit në Beograd, pas ndalimit që i është bërë në Merdarë të Premten.
Paraprakisht ai ishte dërguar në Kurshumli ku i ishte caktuar paraburgimi prej 1 muaji.
