Trajneri Carlo Ancelotti ka thënë të premten se Jude Bellingham është lojtari më i mirë në botë, një ditë para se Real Madridi ta nisë mbrojtjen e trofeut të Kupës së Mbretit.
Madrilenët të shtunën në orën 21:30 e zhvillojnë në udhëtim tek Arandina ndeshjen e 1/16 së finales së “Copa del Rey”.
Arandina është skuadër e kategorisë së katërt të futbollit spanjoll.
Ancelotti ka thënë të premten se Bellinghami, i cili ka shënuar 17 gola në të gjitha garat në sezonin aktual, do të jetë pjesë e skuadrës së Realit, bashkë me Toni Kroosin, Aurelien Tchouamenin dhe Vinicius Juniorin.
“Bellingham po kalon formë të mirë. Ai ka bërë punë të mirë në pjesën e parë të sezonit, marrë parasysh se ai duhej të adaptohej në klubin e ri, kulturën dhe gjuhën e re. Për ne ai qartë se është më i miri”, ka thënë Ancelotti.
Real Madridi vitin e kaluar e fitoi trofeun e 20-të të Kupës së Mbretit, pasi mposhti në finale Osasunan me rezultatin 2:1.
